Vintecinco anos dan para moitos quilómetros, moitas saídas, moitas carreiras, un sinfín de sprints e de portos de montaña, pero sobre todo ao Club Ciclista Riazor servíronlle para facerse grande sobre bici.
O club da cidade coruñesa celebraba esta fin de semana cunha gala os seus 25 anos de historia. No transcurso da mesma se entregaron diferentes recoñecementos a persoas que, durante todo este tempo, sumaron o seu esforzo sobre a bicicleta, nos despachos ou nos dous eidos, para que hoxe o club poidera celebrar este aniversario.
Hai tempo que este equipo coruñés de ciclismo empezou a pedalear e non precisamente a piñón fixo. Durante estos 25 anos o CC Riazor contou con diferentes seccións, do ciclismo en estrada, se cadra a modalidade máis habitual nos diferentes equipos ciclistas; á bici de montaña (BTT) que en Galicia ten escenarios absolutamente especiais; pasando polo triatlón, unha disciplina coa que xa non contan e na que as mulleres do Riazor tamén tiveron presencia; ou polas brevets nas que os randonneurs do equipo herculino suman quilómetros e experiencias, ata chegar á última das seccións que se incorporou a esta entidade: a de ciclismo adaptado.
O CC Riazor fundou a primeira sección de ciclismo adaptado de Galicia. O artífice da iniciativa foi o actual presidente da entidade: Iván Manoel Montero.
Co nome de ‘Paraciclismo Galicia‘ por bandeira compite arestora varias mulleres. Mila López foi a primeira en subirse ao carro, pero a ela fóronselle sumando outras como Natalia, Vitoria, Jennifer... Estas handbikers forman xa unha familia ciclista. Son gañadoras e atesoran para o club un merecido palmarés como demostraron nesta último Campionato de España de onde o CC Riazor trouxo para Galicia cinco triunfos, catro deles de mulleres: Jennifer Feijoo, Pilar Montoya, Eva López e Natalia Victoria. O quinto foi precisamente do home que fixo posible a sección, Iván.
Catro vitorias para o Paraciclismo Galicia no Campionato de España de Ciclismo Adaptado de estrada
O CC Riazor foi tamén este curso gañador da Copa de España por equipos. E a nivel individual, Natalia Vitoria, Eva López e Pilar Montoya, así como Iván Manoel Montero, tamén lideraron as súas categorías, sumando un total de catro triunfos máis para Paraciclismo Galicia.
Con todo, seguramente o maior mérito deportivo e social desta entidade no que a deporte feminino se refire é que, agora mesmo o CC Riazor é club de España que conta con máis mulleres nas súas filas en ciclismo adaptado.
O presidente, Iván Manoel Montero explicaba hai pouco a As Nosas nunha entrevista que precisamente acadar a paridade no equipo de ciclismo adaptado era un dos obxectivos do club. “Sempre quixemos ter metade e metade, tanto para feminino e masculino, era un obxectivo que tiñamos desde o principio. Empezamos Mila López e eu, rematamos o primeiro ano con 4 e actualmente somos 15 e case a metade son mulleres”, explicaba o presidente do Club Ciclista Riazor.
Gala do 25 aniversario do Club Ciclista Riazor
Na gala dos 25 anos do Club Ciclista Riazor recoñeceuse a labor de:
- Antonio Ferreiro Couselo – Fundador
- José Daniel González Castro – Presidente 2015 – 2019
- Felipe Novoa Conde – Randonneur máis destacado
- Manuel Prieto Alvedro – Máster máis destacado
- Arturo Quintela – Iniciador da especialidade Randonneur
- César Lage Pérez – Pola promoción de probas de ciclismo adaptado en Galicia
- Emilio López Blanco – 25 años de fundador a mestre.
- Manuel Fuentes Pico – Randonneur con más quilómetros
- Federación Galega de Ciclismo – En agradecimento ao apoio que fai ao ciclismo adaptado
- José Miguel Seoane Sánchez – En recoñecemento á labor que ten realizado.
- Iván Manoel Montero Ferreiro – Como iniciador e impulsor da primera sección de ciclismo adaptado en Galicia.
Na recta final da gala, coa entrega deste último galardón, varias das persoas integrantes da sección de paraciclismo do Club Ciclista Riazor subiron ao escenario e outras conectáronse por video conferencia para sumarse á felicitación a Iván Manoel Montero pola posta en marcha da sección de ciclismo adaptado. Foron varias as e os deportistas que destacaron que neste grupo síntense en familia. Destacaron tamén a importancia de poder acudir ás competicións como un equipo, e non en solitario como lles acontecía antes de sumarse ao Club Ciclista Riazor.
