Ata cinco ciclistas do Paraciclismo Galicia subiron ao podio esta fin de semana no peche do Campionato de España de Ciclismo Adaptado de estrada. O club galego contou con representación en distintas categorías, sumando medallas da man de Jennifer Feijoo, Pilar Montoya, Eva López e Natalia Victoria nas probas femininas. Nas masculinas, Iván Manoel Montero tamén se alzou coa vitoria.
A competición estatal de Cenicientos celebrou as probas en liñas de todas as clases, de bicicleta a handbike, pasando por tándems e triciclos, así como as probas a contrareloxo de bicicletas. Esta era a segunda parte da competición xa que a primeira, celebrada en maio, tivo que suspenderse polo falecemento tras un accidente dunha voluntaria de Protección Civil.
As ciclistas do Paraciclismo Galicia suman catro vitorias femininas
Dentro das deportistas do Paraciclismo Galicia, Natalia Vitoria fíxose co ouro en H2, igual que Eva López no H3 e a súa compañeira Pilar Montoya en H4. Tamén se alzou coa vitoria Jennifer Feijoo, vencedora da proba C2 de bicicletas.
Cabe destacar que para esta competición estatal todas as ciclistas competiron coas súas correspondentes seleccións, agás Eva López, quen decidiu competir coa camiseta do Paraciclismo Galicia.
No apartado masculino, Iván Manoel fíxose co triunfo na categoría H5, sendo a única vitoria masculina. O galego Damián Ramos lideraba a súa categoría, o C5, sendo o claro favorito ata que unha caída lle impediu chegar na primeira posición a meta, véndose obrigado a abandoar o circuíto. Tamén participou como parte de Paraciclismo Galicia Alberto Albade, que resultou oitavo en C2.
Campioas da Copa de España
Ademais dos grandes resultados acadados na competición desta fin de semana, hai quince días as ciclistas de Paraciclismo Galicia apuntáronse outro triunfo. O equipo resultou gañador da Copa de España, unha competición disputada ao longo da tempada con diversas probas.
A nivel individual, Natalia Vitoria, Eva López e Pilar Montoya, así como Iván Manoel, tamén lideraron as súas categorías, sumando un total de catro triunfos máis para o club galego de Paraciclismo Galicia.
