A gran festa anual do ciclismo galego terá este ano como escenario a comarca do Salnés. O sábado 24 de febreiro Ribadumia acollerá a Gala Ciclismo Galego, “a única xuntanza sen bicicletas do pelotón autonómico”, tal e como lembran desde a Federación Ciclismo Galego. As portas do Auditorio Municipal pecharanse ás 20:15 horas e un cuarto de hora despois subirase o pano para recoñecer fitos sobranceiros e aos mellores ciclistas da última temporada.
A Federación Ciclismo Galego (FCG) ten preparada unha cerimonia na que as entregas de premios combinaranse coas lembrazas e o entretemento.
O capítulo de galardóns polos resultados obtidos nos últimos doce meses abrangue os podios asinados polas corredoras e corredores da nosa comunidade a nivel internacional, nos Campionatos de España e nas xerais das Copas estatais, así como a coroación das gañadoras e os gañadores dos Rankings Federación Ciclismo Galego (FCG).
Estas clasificacións están dispoñibles na páxina web da Federación Ciclismo Galego (FCG). para a súa revisión. Desde a FCG recórdase “que segundo a Normativa aprobada na Asamblea, para optar ao trofeo de recoñecemento de líder do ranking correspondente é necesario ter disputado tres probas puntuables ou o 50% das mesmas”.
Os outros homenaxeados da Gala recibirán as Mencións Especiais como distincións polas súas traxectorias excepcionais. Nos vindeiros días a FCG desvelará a nómina de premiados neste apartado.
