O Atlético Guardés competirá un ano máis na fase final da Copa da Raíña, que nesta edición celebrarase en San Sebastián entre o 29 de abril e o 1 de maio. Ante o éxito deportivo das miñotas, e tamén do Balonmán Cangas, que acadou a mesma clasificación pero na categoría masculina, a Xunta de Galicia organizou unha recepción para felicitar a ambos equipos.
A Secretaría Xeral para o Deporte reuniu aos clubs o 8 de marzo, o Día Internacional da Muller, para destacar ademais a igualdade do deporte galego, cun alto nivel tanto nos conxuntos femininos como nos masculinos.
O secretario xeral para o Deporte, José Ramón Lete Lasa, destacou a “enorme calidade” do balonmán galego e asegurou que tanto o Guardés como o Cangas son “líderes e referentes” para moitos mozos e mozas que soñan con xogar algún día competicións europeas, como o leva facendo o club da Guarda durante oito anos consecutivos ou como acadou o equipo do Morrazo nas tempadas 2005-2006 e 2015-2016.
“Que o mellor equipo feminino e o mellor equipo masculino do balonmán galego se clasifiquen simultaneamente para unha competición na que xogan os oito mellores equipos de España, é unha noticia marabillosa nun día tan importante de visibilización da igualdade como é o 8 de marzo”, engadiu Lete Lasa.
O mandatario galego recoñeceu a gran campaña que están a realizar tanto o Guardés como o Cangas que, neste momento, transitan polos postos cuarto e quinto das máximas categorías nacionais de balonmán e ratificou o apoio da Xunta de Galicia na presente tempada, lembrando asemade que en 2021 ambos os dous equipos recibiron da Secretaría Xeral para o Deporte preto de 100.000 euros (95.824,90 o Guardés e 99.145,09 o Cangas).
Lete Lasa, tal e como apuntan desde a Xunta, destacou que tanto o Plan de Patrocinio Publicitario para os equipos de alta competición de Galicia como o Plan de Patrocinio Publicitario contra a violencia de xénero dos equipos de alta competición femininos de 1º e 2º máximo nivel estatal de Galicia, seguirán a ser dúas das principais fontes de ingresos destes conxuntos.
