O Valladares recibe o vindeiro domingo ao Deportivo ABANCA “B” na xornada 14 da Primeira División Nacional. Se as viguesas logran a vitoria, igualaran a puntos ás herculinas. O vindeiro domingo ás 12:30 vivirase un duelo de altura.
O adestrador do Valladares, Gabi Couñago falou do potencial do filial coruñés na previa do encontro: “Sempre é un partido que nos vén mal porque últimamente sempre nos toca xogar contra o Dépor B despois dos paróns. O filial deportivista seguramente é dos equipos que máis adestra na categoría e é un rival moi difícil por medios e porque moitas das súas xogadoras adestran co primeiro equipo”.
Obxectivo do Valladares: quedar entre os tres primeiros
O técnico galego fixa os obxectivos desta segunda volta para o seu equipo: “Estamos a crecer bastante e o obxectivo desta segunda volta é mellorar o que fixemos na primeira e meternos entre os tres primeiros. Pero iso, empeza gañando o domingo. Non temos presión, é máis un obxectivo de vestiario e de ilusión”.
Gabi Couñago, adestrador do Valladares: Estamos a crecer bastante e o obxectivo desta segunda volta é mellorar o que fixemos na primeira e meternos entre os 3 primeiros
“Os dous equipos coñecémonos moi ben e está claro que elas son un equipazo. Temos que aproveitar que a elas cústalles xogar na nosa casa e que é posible que teñamos máis opcións que cando xogamos nós alí en Abegondo”, falou Couñago sobre as posibilidades do seu equipo de facerse cos 3 puntos.
O Valladares presenta dúas baixas importantes para o partido contra o filial deportivista. A centrocampista Nerea y a dianteira Laura Trabazos: “Temos varias baixas, unha moi importante que é a de Nerea, nosa mediocentro habitual, por acumulación de tarxetas. Tamén temos a posible baixa de Laura Trabazos que é a nosa dianteira, a nosa máxima goleadora e que chega moi xusta para o partido. Seguramente non forcemos con ela”.
