A terceira edición do Toreno Futmenina xa está en marcha. Nesta ocasión o evento celebrarase os días 9 e 10 de abril, coincidindo co xoves e venres de Semana Santa, e terá lugar no campo de O Redondo, en Montrove (Oleiros). O Torneo Futmenina, que naceu co único obxectivo de fomentar e dar notoriedade ao fútbol feminino, constará dun campionato de F8 feminino e batalla de porteiras, así como o xa tradicional partido de veterás. Este ano ademais incorpora o torneo “ mini-futmenina”, para que as máis pequenas tamén poidan participar.
Todas as xogadoras rexistradas recibirán un pack de benvida, e para as gañadoras do torneo de F8 e a batalla de porteiras haberá premios. As inscricións xa están abertas e pecharanse o 15 de marzo. O prezo das mesmas é de 12€ por persoa. Todas as mozas que queiran apuntarse, poderán facelo aquí ou ben enviando un email a info@futmenina.com.
O número mínimo de xogadoras por equipo será de 10, e o máximo de 14. O mínimo de idade das xogadoras para poder participar será de 14 anos. O obxectivo da organización é que todas as mozas interesadas poidan apuntarse, e por iso se tamén se ofrecerá axuda para atopar equipo a aquelas xogadoras que queiran inscribirse pero aínda non o teñan ou non cheguen ao mínimo de xogadoras.
Durante o torneo, as futbolistas terán á súa disposición servizos de fisioterapia e hostalería, así como acceso a aseos, duchas e zonas cubertas. O Torneo Futmenina é un torneo organizado polo Unión Campestre F. C. de Montrove e pola web Futmenina.com, unha web de fútbol feminino creada hai apenas un ano por tres novas e ex futbolistas galegas. Para a súa organización contouse coa colaboración do Concello de Oleiros, así como coa inestimable axuda de marcas internacionais e locais como McDonalds, Ibéritos, Kalekói, Muulhoa Cosmética Galega e Somos Océano, varios equipos e xogadoras da liga Iberdrola, comercios locais da zona e profesionais e psicólogos deportivos a nivel nacional.
