Unha nova edición do Teresa Herrera de fútbol feminino é o punto de arranque competitivo do Dépor ABANCA para este curso 2023-24. O trofeo herculino xógase hoxe, sábado 5 de agosto, a partir das 17:00 horas no Estadio ABANCA-RIAZOR. O rival nesta 11ª edición do Trofeo Teresa Herrera Feminino é o Deportivo Alavés Gloriosas, un equipo co que comparte categoría e obxectivo. Ambos os dous bloques de futbolistas aspiran ao ascenso á elite do futfem estatal esta tempada. E para os dous o Teresa Herrera será a primeira pedra de toque.
Con Riazor como escenario de luxo para amosar a súa mellor faciana á afección branquiazul, As Nosas buscarán varias cousas. A primeira, o triunfo, levar o XI Trofeo Teresa Herrera feminino. Que a Torre quede na casa.
Outra é tamén fundamental en pretempada, acoplar as pezas do equipo e poñer en marcha ante un rival de empaque os plantexamentos tácticos, as xogadas ensaiadas, o xogo combinativo… en definitiva intentar deixar pegada de como vai ser o xogo que identificará ao Dépor ABANCA deste curso, o segundo na etapa de Irene Ferreras á fronte do banco.
O último e non menos importante é gozar de xogar nun escenario como Riazor e facer que o público desfrute tamén do xogo das branquiazuis e a bancada se enganche, como apuntaba a adestradora deportivista na rolda de prensa previa ao partido. Riazor non deixa de ser un escaparate para o Dépor ABANCA diante dunha parte da bancada deportivista que non coñece como xogan. E que poderían acudir a Abegondo e sumar no alento ás branquiazuis aínda en máis número. Sendo conscientes de que as entradas dos partidos das nosas xa son de por si notables, sempre se aspira a máis.
O encontro será retransmitido en directo pola canle de Youtube oficial do RC Deportivo grazas á firma Auga de Parada, segundo informa o club deportivista.
#TERESAHERRERA | Mañá sábado tes unha cita con #ANOSAHISTORIA no #TrofeoTeresaHerrera. Agardámoste en ABANCA-RIAZOR!
Tamén podes seguir os partidos #DéporABANCAAlavés e #DéporBragantino na nosa canle oficial de YouTube grazas a #DéporXiraAugadeParada con esta programación 👇🏻👇🏻👇🏻… pic.twitter.com/LPK7MC543U— RC Deportivo (@RCDeportivo) August 4, 2023
As Nosas buscarán a súa cuarta Torre de Hércules após lograr as edicións de 2016 (2-2 e 4-3 nos penaltis) ante o Villarreal CF; a de 2020 (1-1 e 5-3 nos penaltis) fronte ao Victoria CF aínda que neste caso co equipo B; e a do ano pasado (2-2 e 5-4 nos penaltis) fronte ao FC Famalicao.
Ainhoa Marín, baixa para o Teresa Herrera
O Dépor ABANCA conta coa baixa de Ainhoa Marín, que se recupera dunha intervención de xeonllo realizado durante o descanso estival. “A súa recuperación está a ser moito máis rápida do esperado. Por como se está sentindo ela e por como está a ser o proceso, que está a ser bastante bo porque llo ha currado moito durante todo o verán, probablemente teñámola dispoñible para o principio de liga. Non sabemos en que xornada, pero nese mes de setembro seguramente”, comentou respecto diso Irene Ferreras .
#ASNOSAS convocadas para o XI #TrofeoTeresaHerrera en #ABANCARIAZOR: #DéporABANCAAlavés. Ás 17:00 h. Tamén en 📺 https://t.co/BRgppwOSdO gracias a #AugadeParada pic.twitter.com/sdU1uItgmt
— RC Deportivo (@RCDeportivo) August 4, 2023
Engade a adestradora branquiazul que “ela está a desexar poder sumar para o equipo pero hai que ser cautos porque é unha futbolista súper importante para nós e querémola ter en boas condicións toda a temporada”.
Pola súa banda, Carmen Carballada, Martina Rivas e a internacional Elena Vázquez serán as representantes da canteira branquiazul na convocatoria, ademais de Paula Monteagudo, que é xa unha futbolista habitual na dinámica do primeiro equipo.
Irene Ferreras, adestradora do Dépor ABANCA, manifestaba en rolda de prensa estar “encantada” coas futbolistas canteirás porque “tes a sorte de estar a adestrar e ves que non desentonan, que teñen un nivel parello… É certo que teñen que ir collendo hábitos máis profesionais. Para iso estamos nós, para ofrecerlles iso e ese crecemento”.
Insiste a técnica madrileña en “promocionar a esas xogadoras. Está a facerse un traballo moi bo desde abaixo e temos xogadoras moi interesantes que interesan noutros clubs. Entón hai que abrirlles a porta, hai que darlles a posibilidade non só de xogar, senón de crecer, de adaptarse a un día a día esixente, de madrugar, de adestrar, de facer cousas como coidar a alimentación, o descanso, ximnasio… Moitas cousas que hai que facer para ser futbolistas de elite. Estamos a pór eses cimentos para que esas futbolistas poidan máis pronto que tarde ser xogadoras que vexamos no campo no primeiro equipo”.
O Deportivo Alavés Gloriosas, outro aspirante ao ascenso
Pola súa banda, o Deportivo Alavés Gloriosas preséntase en ABANCA-RIAZOR despois de descender a pasada campaña da liga F e, por conseguinte, será tamén rival das Nosas en Primera Federación Iberdrola. Para as vitorianas o de hoxe en ABANCA-RIAZOR será tamén o seu primeiro test desta pretemporada. Fronte a fronte estarán dous equipos que aspiran ao ascenso.
Finalizado o encontro, o Dépor ABANCA descansará o domingo 6 de agosto e volverá aos adestramentos o luns 7 ás 10:00 en Abegondo.
Irene Ferreras: “Queremos gañar o Teresa Herrera, pero haberá rotacións”
