As táboas que campearon no marcador ao final do partido entre Dépor ABANCA e SD Eibar dan conta da igualdade entre ambos os dous equipos nun partido no que o liderado da Primera Federación FutFem estaba en xogo. O resultado final 1-1 deixa á SD Eibar como estaba, líder, e ás galegas na terceiras. O triunfo 3-0 do Barcelona B ante o Athletic Club B pon ás blaugranas segundas por mellor golaverage.
No arranque do partido o público que se congregou nas bancadas de Abegondo foi testigo da solidez defensiva das locais, e das ganas de resolver das visitantes.
Sempre alineadas como se houbese un tiraliñas, Samara, Inés Altamira, Raquel García e Cris Martínez mandaban na zaga branquiazul. Como reforzo aparecían Henar ou Paula segundo por onde chegaba o perigo.
As galegas sacaban o balón en curto pese á presión alta exercida pola SD Eibar. Por moito que a bancada pásase nervios ao ver as eibarresas demasiado preto da portaría de Lucía as deportivistas non se sacudían o esférico cun paradón buscando resolver. Non. Saltaron ao campo a xogar ao fútbol e mimar o esférico. Así que aínda que asediadas polas visitante, as galegas tocaban en curto, sen dúbidas, confiando en que sabían o que facían. Algún susto houbo, pero o bloque que prepara Irene Ferreras mostrouse firme no seu facer defensivo.
Nestes minutos de xogo, habería que apuntar no debe do Dépor ABANCA a súa inexistente pegada ofensiva. As branquiazuis amosárosen incapaces de crear ocasións. Incluso de pasar do medio campo.
Con 15 minutos de xogo a meirande parte do xogo se tiña desenvolvido na cancha das coruñesas. Eso si, sen perigo para a meta defendida por Lucía. Foi a tónica da primeira metade do partido. O Dépor ABANCA non era quen de construír e a SD Eibar asediaba ás locais cunha presión alta e asfixiante.
O primeiro disparo a porta da SD Eibar chegou superados os 17 minutos de xogo. Botaban as visitantes un córner cun remate fóra dos tres paus de Jujuba. O remate fóiselle alto.
Efectividade máxima do Dépor ABANCA que se traduce en gol
Pasaron os minutos sen que mudase o guión ata que fixo acto de presencia, para desequilibrar o marcador a efectividade máxima do Dépor ABANCA. Case non tiñan pisado a área rival ata ese momento pero no minuto 35 as galegas transformaron a súa primeira ocasión clara en gol. Henar e Paula fixeron a xogada e meteron o balón aos pés de Raquel García que remataba cun tiro cruzado a media altura batendo a Noelia (0-1).
Xusto antes o partido estivera parado varios minutos pola lesión de Noko Matlou. Aproveitouse para unha sorte de parada para hidratación e tempo morto no que os dous técnicos deron instruccións ás futbolistas.
Co Dépor ABANCA por diante no marcador chegábase ao descanso. No arranque da segunda metade a primeira chegada deportivista, contra o minuto 48, rematou en gol de Inés Altamira, pero a liña xa tiña levantada a bandeira sinalando fóra de xogo que anulaba a xogada e polo tanto impedía que o tanto fose válido.
Esperanza Pizarro lanzaba no minuto 56 unha falta directa para a SD Eibar. O seu disparo que supera a barreira branquiazul e pasaba por encima longueiro con moito perigo xa que ía moi ben dirixido á escuadra.
Co paso dos minutos o partido complicábase para o Dépor ABANCA. No min 60 chegou unha xogada de perigo na que, con Lucía xa batida, o balón saía fóra. Na seguinte, no 61 de xogo, empataba a SD Eibar con gol precisamente da ex deportivista Andrea Sierra (1-1).
Activouse a fame de gol do Dépor ABANCA que, doente, foi a pola meta rival con ansia. Un centro de Cris que non puido remata Laura é un exemplo das chegadas das coruñesas.
Un pouco despois, no 69, Ainhoa Marín recibía o balón de Millene con moitos metros por diante. Pero, cando encaraba xa á meta, esvarou na área e esmoreceu a ocasión. Foi aí cando Laura Fernández (cunha posible lesión), deixaba o seu sitio a Eva Dios.
Intentouno o Dépor ABANCA sen éxito nos seguintes minutos. Por exemplo cando no no 77 Eva Dios controla o balón en mediocampo para mandar cara á esquerda onde recibe Ainhoa Marín que manda un centro ao caldeiro, o remate da súa compañeira váiselle das mans a Noelia estando a piques de entrar e cruzar a liña de gol.
Entraron no campo para dar recambio e aire fresco Carlota Suárez por Charle, aportando chegadas desde a dereita do ataque deportivista. E tamén entraron Sara Navarro e Patri López por Ainhoa Marín e Samara, respectivamente.
Houbo máis de sete minutos de engadido, comprensibles polas interrupcións que tivera o xogo, pero non serviu para que nin eibarresas nin coruñesas anotasen. O 1-1 quedou no electrónico da Cidade Deportiva de Abegondo como resultado final deste duelo no cumio da Primera Federación FutFem.
Segundo informa o club coruñés As Nosas deportivistas teñen xornada de descanso mañá domingo 30 de outubro. A adestradora Irene Ferreras citou de novo ao seu cadro o luns 31 de outubro ás 10:00 na Cidade Deportiva de Abegondo para un novo adestramento.
A próxima cita do RC Deportivo ABANCA será de novo en Abegondo, o domingo 6 de novembro ás 12:00 ante o SE AEM. O cruce corresponde á oitaba xornada de Liga na Primera Federación RFEF FutFem .
FICHA TÉCNICA
1) RC DEPORTIVO ABANCA: Lucía, Cris Martínez, Inés Altamira, Raquel García, Samara (Patri López, min. 87), Paula Gutiérrez, Henar, Ainhoa Marín (Sara Navarro, min. 87), Laura Fernández (Eva Dios, min. 70), Charle (Carlota Suárez, min. 80) e Millene.
1) SD EIBAR: Noelia, Andrea Sierra, Jujuba, Carla Andrés, Noko Matlou, Arene (Andrea Álvarez, min. 86), Honoka Yonei, Campos, Jone Ibáñez, Geraldyne Saavedra (Valentina Morales, min. 77) e Esperanza Pizarro (Kenni, min. 86).
GOLES: 1-0 Raquel García (min. 35); 1-1 Andrea Sierra (min. 62).
EQUIPO ARBITRAL: Claudia Cebollada López pertencente ao colexio valenciano. Amonestou con cartón amarelo á futbolista Paula Gutiérrez no bando deportivista (min. 73).
INCIDENCIAS: Partido correspondente á sétima xornada de liga na Primera Federación RFEF de Fútbol Feminino disputado na Cidade Deportiva de Abegondo ante unha boa entrada con preto de 500 seareiras nas bancadas. O partido entre galegas e guipuzcoanas foi transmitido pola canle de YouTube do RC Deportivo.
