- Ourense converteuse na capital do fútbol gaélico esta fin de semana coa disputa dunha nova edición da Celtic Cup na que as Seleccións Galegas feminina e masculina acadaron senllas medallas (prata e ouro respectivamente)
Un campionato masculino e un subcampionato feminino poñen de manifesto o nivel dos nosos e das nosas futbolistas na especialidade de fútbol gaélico. O campo sintético da Universidade de Ourense albergou esta fin de semana a segunda edición da Celtic Cup, un torneo no que participan como convidados equipos de Irlanda e que aspira a converterse nun referente no eido europeo.
Un subcampionato para as nosas futbolistas
A edición feminina da Celtic Cup constaba dun triangular que enfrontaba á Selección Galega primeiro ás futbolistas do St. Sylvesters e logo ás vellas coñecidas de 2023, Kilmacud. O primeiro encontro comezou de cara para as Irmandiñas, que anotaron nos primeiros minutos, pero segundo avanzou o encontro o acerto no tiro a paus menguou. Malia o arreón final, as galegas perderon pola mínima (9-10).
A Selección Galega masculina de fútbol gaélico, campioa
A Selección Galega masculina conquistou o trofeo que xa acariñara o ano pasado na Celtic Cup. Logo dun sólido inicio local, os dublineses de St. Sylvesters impuxeron o seu ritmo e mandaban no descanso 15-10. O paso polos vestiarios sentoulle ben á Selección Irmandiña, que saiu coas ideas máis claras nunha segunda parte totalmente de ida e volta. Logo de remontar o resultado, Galicia aguantou os derradeiros minutos ata finalizar o encontro 30-27.
Sen tempo ao respiro, deu comezo o segundo encontro contra Kilmacud, buscando a revancha do ano pasado. A pesar de ir 2-4 abaixo no descanso e do cansanzo de xogar dous partidos consecutivos, as locais sacaron carácter e levaron a vitoria por 13-8. Malia todo, o título foi para o equipo de Malahide ao gañar o derradeiro 8-3 contra Kilmacud.
Seguinte parada, a Haia
O parón das Seleccions Galegas continúa a fin de semana que vén, xa que repiten visita ao Torneo Internacional da Haia, o máis prestixioso do continente e que Galicia ten a honra de ser o único equipo europeo continental de ter participado (participan equipos de Irlanda e Reino Unido), segundo informa a RFGF.
