O deporte galego ten alta presenza no equipo paralímpico español. Ata 21 deportistas, un 15% do total, proceden de Galicia e entraron dentro da lista de preseleccionados para os Xogos Paralímpicos de Toquio 2021. Susana Rodríguez e Adiaratou Iglesias son dúas das atletas que forman parte desta primeira convocatoria e estiveron presentes no acto de presentación da Secretaría Xeral para o Deporte da Xunta de Galicia.
O secretario Lete Lasa afirmou que os deportistas preseleccionados “son o exemplo perfecto de fortaleza e capacidade de superación para moitas persoas e, máis aínda, despois dun período de enormes dificultades como a pandemia”.
O evento deste verán, que terá lugar entre o 24 de agosto e o 5 de setembro, non será o primeiro para Susana Rodríguez. A triatleta competiu xa en Río, conseguindo un diploma e é a candidata española ao Consello de Deportistas do CPI.
Porén, a cita internacional si será a estrea de Adiaratou, que competirá na capital nipona os seus primeiros Xogos Paralímpicos. Outras galegas que forman parte tamén desta primeira convocatoria son Desirée Vila, clasificada en salto de lonxitude e Vicky Alonso, de baloncesto en cadeira de rodas.
Só 115 deportistas españoles irán aos Xogos Paralímpicos
Con todo, formar parte da preselección para os Xogos Paralímpicos non garante a presenza en Toquio. Só 115 dos 250 deportistas elixidos viaxarán finalmente a Xapón. A lista oficial farase pública na primeira quincena de xullo. O obxectivo do equipo estatal é o de clasificar a 115 deportistas paralímpicos e outros 10 de apoio.
A nivel galego, 21 deportistas lograron esta primeira clasificación para os Xogos Paralímpicos, o 15% do total. Ante este dato, Lete Lasa declarou que a explicación está nun “traballo intenso realizado por todo o tecido deportivo en prol dos deportistas con discapacidade e do deporte adaptado”.
O último recoñecemento de deportistas galegos de alto nivel inclúe a 17 deportistas con discapacidade, a que é “a cifra máis alta de deportistas con discapacidade recoñecidos nunha resolución DGAN”, segundo apunta o secretario. Desde o 2004 Galicia outorga a mesma bolsa de axuda en categoría paralímpica e olímpica.
