Unha galega poderá representar a España no Consello de Deportistas do Comité Paralímpico Internacional. A atleta Susana Rodríguez ven de ser presentada como candidata para formar parte do órgano que une a atletas e responsables mundiais da toma de decisións no deporte de persoas con discapacidade.
A deportista galega ten ampla experiencia e éxitos a nivel internacional. Susana Rodríguez é seis veces campioa do mundo de triatlón e acumula numerosas medallas en competicións nacionais e internacionais. Toquio 2021 serán os seus segundos Xogos Paralímpicos, nos que ten confirmada a praza para o triatlón (proba na que rematou quinta en Río 2016), e ten opcións de correr os 1.500 m. na categoría T11.
Os posibles labores de Susana Rodríguez no Consello de Deportistas
De ser elixida, Susana Rodríguez deberá defender os intereses e puntos de vista de todos os atletas, deportes e países. Por este motivo, considerouse á galega como candidata ao posto, ao contar cun amplo coñecemento transversal do movemento paralímpico.
Parte das súas tarefas serían asistir a reunións e grupos de traballo, incluíndo as dúas citas anuais do Consello de Deportistas e dar voz e apoio ao resto de paralímpicos pasados, presentes e futuros tanto dentro da competición como fóra dela.
En total, 13 membros conforman o Consello, seis deles elixidos durante os Xogos Paralímpicos de verán e tres en inverno, ocupando o cargo durante catro anos. O propio órgano pode designar tres membros adicionais por periodos de dous anos, para garantir o equilibrio entre xéneros, rexións, deportes e grupos de discapacidade. Tamén forma parte un representante do Consello de Deportistas do Comité Olímpico Internacional.
Neste caso, seis dos membros elixidos durante Río 2016 se renovarán en Toquio 2021. Segundo informa o Comité Paralímpico Español, ditos membros só poden ocupar o cargo durante dous mandatos.
Rodríguez, atleta do A.F. Celta con discapacidade visual grave, compaxina o deporte coa medicina, que exerce no Hospital de Santiago de Compostela. A súa formación complementaria ao deporte, así como o seu dominio do inglés, foron tidos en conta polo Comité Executivo para propoñela como candidata. Tamén conta co apoio do Consello de Deportistas español.
Antes dela, Teresa Perales xa formou parte do Consello entre o 2008 e o 2016, sendo a candidata máis votada nas eleccións de Londres 2012.
