Triunfo do Dépor ABANCA en Riazor diante do Deportivo Alavés Gloriosas por un tanteo de 2-1. Logo de chegarse ao descanso con 0-0, o tramo final da segunda metade foi o tempo para os goles. Anotou primeiro o conxunto deportivista cun tanto de Millene tras un rexeitamento dun tiro de ADT que tería o seu premio no 2-0 pouco despois. O Alavés marcaría o seu gol ao pouco tempo por medio de Carrillo freando a alegría que estaba impregnando o xogo das locais froito dos dous tantos de vantaxe (2-1). O resultado mantén líderes As Nosas deportivistas que fixeron gozar a preto de 7.000 persoas en Riazor.
Primeiro tiro a porta do partido foi para o Deportivo Alavés Gloriosas nun disparo no minuto 3 de xogo que chapou sen atrancos Yohana.
Minuto 8 o Deportivo Alavés Gloriosas frena unha internada de Ainhoa Marín que corta con falta e cartón para a defensa visitantante. Na acción a balón parado o Dépor ABANCA manda un balón á área que Raquel remata sen éxito pero levando perigo á meta rival
Superados os dez minutos de xogo, Paula manda un balón á dereita cara ao posto de extremo onde recolleuo o esférico e avanzou ata a línea de cal Ainhoa Marín que mandou a pelota á área pequena sen que ningunha compañeira puidese rematar.
Contra o minuto 17 as galegas forzan un córner. Logo do saque, a porteira visitante despexa de puños o balón e o rexeitamento favorece ao Dépor ABANCA. Con todo, o remate de cabeza final de Inés Altamira foi moi feble e acabou nas mans de Sofía.
Nas filas do equipo que prepara Irene Ferreras víase un bo traballo de Henar no medio campo recuperando balóns e repartindo xogo. Laurina, Millene e Ainhoa eran as máis incisivas cara a meta rival buscanco pisar área e tirando a porta nalgúns casos. Un exemplo foi o disparo desde lonxe de Millene no minuto 23 que buscaba a escuadra, pero que rematou por marchar por encima do longueiro.
As chegadas do Deportivo Alavés Gloriosas topaban de cheo cunha defensa deportivista ordenada e colocada que rachaba coas opcións das visitantes.
Preto dos 30 minutos de xogo volve saír de puños Sofía e tira con Ayaka, pero na área pequena. A xogada continúa ata que Paula intenta un remate infructuoso.
O primeiro córner do Alavés chegaría no minuto 34 e foi resolto sen atrancos pola zaga do Dépor ABANCA. Nun minuto caeu o segundo do outro lado froito dun balón que pegou en Inés Altamira e marchou pola línea de fondo. Outra vez a organización e seriedade defensiva das deportivistas fixo que Yohana non vese problemas. Na seguinte xogada Clara Morera chega a rematar moi forzada con Inés Altamira ao seu carón e o balón chapouno con confianza a porteira local Yohana.
As chegadas deportivistas se sucedían pero sen grande perigo. Contra o minuto 38 de partido Ainhoa Marín sube o balón con velocidade e manda entre liñas a Laurina que non acada o premio do gol no seu disparo. Millene remataría un minuto despois e o balón remata en córner.
Logo de que durante toda a primeira metade o control fose por parte das Nosas deportivistas, no minuto 43 chegou a ocasión máis clara do Deportivo Alavés Gloriosas cun saque desde o curruncho que chapou Yohana, pero que foi o disparo con maior perigo das visitantes. E para darlle aínda máis vida aos minutos finais do primeiro acto no Estadio ABANCA-Riazor. No 45 chegou a máis clara do Dépor ABANCA nas botas de Laurina a pase de Clara.
Arrancou a segunda metade con susto para o Dépor ABANCA que recibiu nada máis empezar un tiro de Clara Moreno que chapou sobre a liña de gol Yohana. Un minuto despois un disparo desde a frontal que volveu atrapar a porteira deportivista daba conta de que o Deportivo Alavés Gloriosas saíra ao tepe de Riazor con forza e disposto a dar guerra na segunda metade.
Non tardou en chegar a resposta deportivista cun centro perigoso de Ainhoa Marín desde a dereita do ataque galego que non chega a rematar Laurina ao tocar a zaga visitante.
No 68 de partido o Dépor ABANCA monta un contragolpe aproveitando a punta de velocidade Ainhoa Marín que envía a unha compañeira á esquerda invalidándoo.
Gol de Millene adianta o Dépor ABANCA en Riazor
Superado o minuto 73 de xogo por fin movíase o marcador electrónico do Estadio ABANCA-Riazor e o público local podía festexar un gol deportivista. O tanto asinouno Millene logo dun remate de Ana de Teresa (ADT) que rexeitaba a bocaxarro a porteira visitante. O tanto adiantaba ás coruñesas 1-0.
Chegou o segundo, esta vez si, de Ana de Teresa (ADT), cando Riazor pedía penalti por unha acción previa. Ese 2-0 anotouse no minuto 83.
Empezou aí un xogo máis alegre por parte do conxunto deportivista. Carlota tentouno desde lonxe e apiques estivo de sorprender a Sofía. O seu disparo foise por encima do longueiro por pouco.
Pouco lle durou a alegría as galegas que recibiron un gol de bonita execución anotado por Carrillo (2-1).
De aí ao final as xogadoras que adestra Irene Ferreras non tiraron a toalla nin se conformaron. Seguiron atacando pero o marcador non se movería do 2-1.
Riazor festexou así un triunfo deportivista con As Nosas, que manteñen o liderato na Primera Federación Iberdrola con 21 puntos no seu haber dos 24 posibles. Van xa 8 xornadas de competición e as futbolistas herculinas teñen dous puntos de vantaxe sobre Almaha CF e RCD Espanyol.
FICHA TÉCNICA
0) DÉPOR ABANCA: Yohana, Cris Martínez (Samara, min. 63), Inés Altamira, Raquel García, Clara, Henar, Ayaka (ADT, min. 63), Ainhoa Marín, Paula Gutiérrez, Laurina (Carlota, min. 73) e Millene (Eva Dios, min. 84).
0) DEPORTIVO ALAVÉS GLORIOSAS: Sofía, Tresfield, Pichi, Alba Aznar (Da Eira, min. 81), Andrea Carid (Vanesa Santana, min. 87), Cris Auñón, Almudena (Rebecca Elloh, min. 60), Judith (Laura Moreno, min. 46), Carrillo, Carla Morena (Olga, min. 81) e Sheila.
GOLES: 1-0: min. 73 Millene. 2-0: min. 83 Ana de Teresa ADT. 2-1: min. 88 Carrillo.
EQUIPO ARBITRAL: Nieves Herminia Delgado Beltrán, auxiliada nas bandas por Marta Viciana Fernández e Andrea Viciana Fernández, as tres do comité andaluz. Amosaron cartón amarelo a Almudena (min. 7), Henar (min. 61) e ao banco do Alavés (min. 78).
INCIDENCIAS: Partido correspondente á xornada 8ª da Primera Federación disputado no Estadio ABANCA-Riazor. Acudiron a ver o partido 6.822 persoas. Nos prolegómenos do partido Irene Ferreras presentaba ante o público de Riazor o seu galardón como mellor adestradora da Primera Federación no pasado curso 2022-23. No descanso houbo animación que incluíu diferentes actividades facendo partícipe ao público que se congregou en Riazor. As entradas de persoas non socias tiñan un prezo de 5 euros, que o club deportivista destinará integramente á Asociación Española Contra o Cancro (AECC).
