A primeira liña Paula Arcos Poveda (Petrer, 21/12/2001) é a cuarta e última incorporación do Atlético Guardés para a tempada 2020-2021. A xogadora destra de 18 anos, 169 cm e 63 kg, é por méritos propios una das grandes promesas do balonmán feminino español e pode desenvolverse con soltura na primeira liña, contando con moitos minutos no lateral dereito.
Arcos formouse no equipo de Petrer ata cadete de segundo ano para apostar polo Balonmán Elche, agora cambia de aires tras catro anos no conxunto ilicitano. Á súa idade é unha das fixas no combinado nacional de categoría júnior e ten no seu haber tres campionatos de España, dous co Elche e un coa selección da Comunitat Valenciana. Arcos comezará a pretemporada coas súas novas compañeiras o xoves ás 9 da mañá na Sangriña.
Arcos é a última fichaxe do Guardés para a tempada 20-21 e completa un persoal de 17 xogadoras para José Ignacio Prades. A xogadora recoñece o interese que o club do Baixo Miño mostrara por ela en anteriores ocasións e confesa que lle levou a apostar por fichar este verán: “Xa falara co Guardés outras veces”, conta Arcos, “gústame moito a entrega e dedicación de todas as persoas que forman este equipo e espero encaixar ben e poder mellorar como xogadora”.
Paula Arcos, xogadora do Altético Guardés: “Gústame moito a entrega e dedicación de todas as persoas que forman este equipo e espero encaixar ben e poder mellorar como xogadora”.
A Liga Guerreiras Iberdrola 20-21, a Copa da Raíña a primeira semana de setembro, a EHF European Cup… experiencias novas para unha promesa do balonmán feminino que chega cos obxectivos claros: “O meu reto persoal é gozar moito do equipo, do sitio e sobre todo do balonmán para así poder mellorar como xogadora”, desexa. Ademais aposta polo traballo diario como fórmula para continuar coa súa progresión: “Cada día aprender algo novo e ir subindo chanzos para un futuro”, expón.
Paula Arcos, xogadora do Altético Guardés: “O meu reto persoal é gozar moito do equipo, do sitio e sobre todo do balonmán para así poder mellorar como xogadora”.
Nuns días instalarase lonxe da súa casa e a súa familia e moi consciente de que “vai ser un cambio moi grande en todos os aspectos: virame ben pola miña vida persoal e deportiva aprender cousas novas”, recoñece. Os afeccionados do Guardés xa sufriron “” a Arcos na Sangriña e coñecen o seu potencial, así que espera que “estean contentos con esta fichaxe”.
A súa mensaxe para eles é que “non merecen menos na pista que o mesmo espectáculo que eles dan animando na bancada”, di quen se presenta como “unha xogadora con moito carácter na pista e disposta a dar todo”. Agora terá que encaixar nun equipo que ve “moi unido, moi forte e coas ideas moi claras para ir a por todo en todo momento”, describe. Das súas novas compañeiras só coincidiu compartindo elástica nacional coa extremo dereito Daniela Moreno, dela di que “a vexo moi disposta a aprender moito e con moitas ganas de formar parte deste equipo”.
Tras selar a incorporación de Arcos, o seu xa novo adestrador José I. Prades comentou que a xogadora “vén axudar moito ao equipo, é unha xogadora que está en formación e en continua progresión”. Prades reafírmase en que “é un valor de futuro máis que contrastado dentro do panorama nacional” e móstrase “encantado” coa súa incorporación: “É polivalente, moi completa, defende moi ben e é moi vertical, ten moitísima fame e ganas de seguir aprendendo”. Como último desexo do adestrador: “Que siga crecendo no Guardés e que axude ao equipo para ser máis competitivo”.
José I. Prades, adestrador do Atlético Guardés: “Vén axudar moito ao equipo, é unha xogadora que está en formación e en continua progresión”.
Plantilla pechada de cara á tempada que vén
O técnico do Guardés contará esta tempada cun persoal conformado por 17 xogadoras: as centrais Patrícia Lima e a eslovaca Erika Rajnohová (HSG Vipers Bad Wildungen); Marisol Carratú e Míriam Sempere (Bm. Benidorm) en portería; o extremos Rosario Urban, Lorena Pérez, Laura Morais e Daniela Moreno (Bm. Alcobendas); as primeiras liñas Paulina Pérez, Estefanía Descalzo, Cristina Barbosa, Martina Mazza, Sandra Santiago e Paula Arcos (Bm. Elche); e as pivotes África Sempere, Carla Gómez e Sarah Valero no pivote.
O equipo está citado o xoves para empezar a pretemporada cunha dobre sesión de adestramento (9-11 e 18:30-20:30). O venres adestrarán pola mañá e o sábado de novo en dobre sesión para descansar o domingo.
