No último partido no pavillón municipal do Porriño os dous puntos quedaron na casa. As xogadoras do Conservas Orbe Rubensa Porriño venceron. non sen complicacións, ao Zubileta Evolution BM Zuazo cun resultado final de 31-28.
Esta sétima xornada do grupo pola permanencia non puxo nada en xogo, xa que ambos contrincantes teñen a salvación asegurada. Malia o trunfo galego, o equipo de Isma Martínez cede unha posición e baixa ao segudo posto, quedando o Balonmano Salud Tenerife como primeiro a falta dunha xornada. Porén, ambos equipos empatan a 20 puntos.
O Porriño soubo sobrepoñerse á igualdade do partido
O encontro comezou cunha igualdade máxima no marcador, que o Porriño puido superar co paso os minutos, rematando por impoñerse e levarse a vitoria.
Nos primeiros minutos a vasca Anne Erauskin foi a encargada de abrir o marcador a favor do Zuazo. As conserveiras non quixeron quedarse atrás e responderon ao ataque rival con velocidade. O ritmo do xogo era lto e os contraataques de ambos conxuntos continúos nun vaivén de puntos no pavillón.
Pasados os primeiros dez minutos, o empate a 5 seguía no marcador. O Porriño optou entón por unha defensa 6:0 coa que era capaz de manter a raia ás vascas, reprimindo os ataques das súas primeiras liñas. Pola súa banda, o Zuazo respondía a esta estratexia atacando desde os extremos, mentres que as ofensivas galegas caracterizábase polos cruces e o movemento de balón.
A clave do partido pasou a non cometer erros, cos dous equipos acechando para aproveitar calquera fallo rival. Chegado o ecuador do primeiro tempo, as de Isma Martínez colleron a primeira vantaxe, cun parcial 3-0 en cinco minutos.
No minuto 20, o técnico rival, Joseba Rodríguez, parou o cronómetro para facer reaccionar ás de Barakaldo. A falta de seis minutos para o descanso, o conxunto visitante era a sombra das galegas, chegando a colocarse a só un punto destas. Porén, o Porriño non soltaba a vantaxe conseguida e desta vez foi Martínez quen perdiu un tempo morto para manter a dinámica gañadora das súas.
A primeira parte rematou cun 16-13 e co marcador a favor das locais. O equipo galego foi medrando co paso dos minutos, cunha Estela Carrera brillante baixo paos como unha das súas bazas máis importantes. A gardameta freaba os intentos do Zuazo por puntuar, e logrou que as vacas non transformaran os seus lanzamentos en gol.
Máis empuxe das vascas na segunda metade
Para a segunda metade viuse na pista a un conxunto rival moito máis activo. Os ataques vascos multiplicáronse, pero sen éxito. Pola súa parte, o Porriño apostaba por un xogo rápido de balón, mobilizando de maneira intelixente á defensa vasca.
As iniciativas do cadro de Joseba Rodríguez remataron por dar os seus froitos e no minuto 12 da segunda parte volveu o empate ao electrónico cun 21-21. O ritmo das vascas aumentaba en ataque e en defensa, igualando ás galegas e aproveitando os seus erros. Os minutos pasaban e os dous conxuntos tiñan na súa man levarse a vitoria.
Nos intres finais o xogo de Anthia Espiñeira nas locais volveuse imprescindible. A xogadora dirixía ao Porriño desde o centro, manetendo ao equipo activo e retomando as rendas do encontro. Con cinco minutos por diante para a fin do duelo, o técnico visitante volveu pedir un tempo morto, ao ver ao seu conxunto por debaixo no marcador.
Isto non freou ás galegas, que seguiron imparables ata o pitido final, deixando os dous puntos en casa cun 31-28 final.
FICHA TÉCNICA
CONSERVAS ORBE RUBENSA BM PORRIÑO (31): Alicia Campo (2), Andrea Amarilla, Érica Tavares (4), Inés Hernández (2), Soraia Lopes, Aitana Santomé (2), Arima López (2), Alba Dapena (1), Claudia Kaulback (3), Anthia Espiñeira (7), Sarai Samartin, Mónica Oliveira (5), Sandra Fernández (3), Begoña Otero e Estela Carrera.
ZUBILETA EVOLUTION BM ZUAZO (28): Estíbaliz Velasco (5), Ainhoa Hernández (1), Alba Sánchez (2), Ariadna González, Isabel Fernández-Agustí (1), Maider Barros (8), Maddi Aalla (1), June Loidi, Anne Erauskin (3), Maddi Bengoetxea, Anne Romero e Magdalena Fernández-Agustí (7).
MARCADOR CADA 5 MINUTOS: 3-3, 5-5, 8-7, 10-7, 12-10, 16-13, – descanso -, 17-15, 19-18, 23-23, 26-25, 28-26, 31-28.
ARBITRAXE: Raúl Oyarzun e Aritz Zaragueta. Por parte do Conservas Orbe Rubensa Bm Porriño excluíron a Andrea Amarilla, Sarai Samartin e Sandra Fernández. No Zubileta Evolution Bm Zuazo non excluíron a ningunha xogadora.
INCIDENCIAS: Partido correspondente á sétima xornada da competición na Liga Guerreras Iberdrola dentro da fase pola permanencia.
