Sete derrotas, as últimas tres seguidas, teñen ao Maristas Coruña atascado na parte baixa da Liga Feminina 2. Con 13 puntos, a tres do colista, as coruñesas precisan puntuar para fuxir dos postos de descenso. O seguinte reto será ante o GDKO Ibaizabal, na pista das vascas, o sábado, 12 de decembro, ás 19:00 horas.
O plantel dirixido por Jorge Carreira non logra levantar cabeza e, tras unha dura derrota por unha diferenza moi grande contra o invicto BAXI Ferrol, as galegas precisan unha vitoria para recuperar os ánimos.
O BAXI afunde ao Maristas superando a barreira dos 100 puntos
Debilidades e fortalezas do Maristas
Con todo, o camiño hacia o triunfo non será doado. O Maristas é o cuarto equipo cunha peor valoración media da categoría. Para vencer, as visitantes deberán forzar faltas que lles permitan puntuar desde a liña do tiro libre, única área onde son superiores ao seu próximo rival.
Eugenia Filgueira será clave se as galegas logran este obxectivo, xa que ten unha efectividade do 77,78% a 4,60 metros da canastra; unha das mellores da LF2.
As galegas enfrontaranse a un Ibaizabal que chega dunha derrota contra un rival directo, o Vega Lagunera Adareva Tenerife, dando lugar a unha racha de catro encontros perdidos consecutivamente. Esta é a peor racha da categoría, por detrás das da AD Cortegada e do CB Arxil, e só comparable á do colista, o Magec Tías.
De todas formas, a nivel individual, as vascas contan con boas xogadoras como Juana Molina que, malia a derrota, foi a MVP do partido e terceira da competición na anterior xornada. A escolta é, ademais, unha das mellores anotadoras desde a liña de tres, unha zona que deberán cubrir ben as coruñesas.
Pero o Maristas tamén conta coas súas propias estrelas. Andrea Pérez está destacando moito neste curso, situándose entre as mellores anotadoras da categoría e entre as mellor valoradas.
O duelo que se disputará en Vizcaia será vital para o futuro de ambos clubs, que precisan unha vitoria para mudar as malas sensacións e coller un bo ritmo na competición.
