Non o tivo fácil o BAXI Ferrol para conseguir a vitoria (67-88) na cancha do Maristas Coruña, a pesar de que o conxunto ferrolán levou a iniciativa no marcador en todo momento, pero o seu rival puxo moita intensidade ao longo do choque e demostrou maior adaptación á dura superficie do seu pavillón. Deste xeito, o derbi das Rías Altas da LF2 puxo rumbo ao norte e voou de terras herculinas.
No primeiro parcial, as vantaxes do cadro departamental oscilaron entre o catro e o seis puntos para chegar ao final do dez primeiros minutos cun resultado de 14-19. Aínda estaba o partido aberto e as coruñesas plantábanlle cara ás ferrolás.
No segundo cuarto, o BAXI ampliou un pouco a súa vantaxe, aínda que as herculinas que adestra Jorge Carreira non lle deixaron marcharse no marcador, demostrando un gran acerto nos lanzamentos afastados, aínda que o equipo visitante adiantouse cun 30-42, para chegar ao descanso cun 32-44.
Xa á volta de vestarios, no terceiro parcial, ningún dos dous equipos estivo ben en defensa. O BAXI Ferrol permitiulle anotar moitos puntos ao seu rival. E dese xeito Maristas Coruña foi recurtando distancias até colocarse a só seis puntos das da cidade departamental.
O electrónico reflectía un resultado de 45-51. Pero nos últimos minutos o equipo ferrolán ampliou a súa renda até o 56-71, cun triplo de Patri Benet desde o centro do campo sobre a bucina.
O BAXI Ferrol apretou nos minutos finais ate ampliar a súa vantaxe
No últimos dez minutos do partido, as pupilas de Lino López lograron a súa máxima renda, 56-77, e a partir dese momento o marcador moveuse cunhas vantaxes próximas ao vinte puntos.
Foi aí cando o Maristas Coruña se viu superado polo equipo visitante, que vive un momento doce de xogo e de resultados. O choque remataría finalmente cun resultado de 67-88. Este tanteo lle concede ao BAXI Ferrol que adestra Lino López a súa vixésimo cuarta vitoria consecutiva. Aí é nada!
A próxima xornada, outro duelo entre galegas
Ao final desta vixésimo cuarta xornada na Liga Feminina 2, o BAXI Ferrol segue sendo o líder indiscutible do Grupo A desta categoría, e o conxunto coruñés do Maristas ocupa a décima praza da clasificación.
Na vindeira xornada ao BAXI Ferrol lle agarda outro duelo entre galegas xa que recibe ao Celta Zorka Recalvi (terceiras clasificadas), mentres que o Maristas Coruña volve actuar como local e recibi en terras herculinas ao GDKO Ibaizabal (sextas clasificadas)
FICHA TÉCNICA
67) MARISTAS CORUÑA: L. Martínez (7), T. Casal (10), M. Cortés (7), E. Filgueira (11) e L. Galán (4) – quinteto inicial -. Tamén xogaron: J. Pereira (13), M. Feijóo (-) L. Cervelo (8), A. Pérez (7) e L. Hughes (-).
88) BAXI FERROL: Brooke Salas (11), L. Fernández (5), I. Gari Gilabert (11), G. Leaupepe (7), M. Aijanen (14) – quinteto inicial -. Tamén xogaron: Patricia Cabrera (11), J. Mungo (5), Patri Benet (4), Natalia Rodríguez (5), Andrea Boquete (4) e Sune Swart (11)
PARCIAIS: 14-19, 18-25, 24-27 e 11-17
ÁRBITRAS: Romina Marchiano Ucelli e Iris Díaz Feijoo.
INCIDENCIAS: Partido disputado no Pavillón do Colexio Maristas da Coruña correspondente á xornada 24ª da Liga Feminina 2.
