O Dépor ABANCA imponse ao EDF Logroño na Cidade Deportiva de Abegondo ante un cento de afeccionadas que puideron gozar do primeito triunfo das de Manu Sánchez como locais.
Traballo, constancia, grupo, fútbol, fe e goles. Con ese combinado vitamínico está a curarse o RC Deportivo ABANCA dos males que aqueixaban ao plantel coruñés, un combinado que, ata que hai pouco, non conseguira aínda os seus primeiros tres puntos da tempada.
Tras abrira a lata das vitorias a semana pasada coa SD Eibar, Dépor ABANCA suma o seu segundo triunfo consecutivo, desta volta na casa e diante do EDF Logroño. Para non quitarlle tensión ao partido, as deportivistas estiveron perdendo e remontaron con goles de Athenea e Peke.
Contención e precaucións en ambas escuadras nos primeiros minutos. Tanta que case houbo que agardar un cuarto de hora para contabilizar a primeira ocasión, que, por certo, foi rioxana. Olga García (que máis tarde abandonaría o terreo de xogo por mor dunha lesión no xeonllo) botaba unha falta na que Noe Bermúdez tivo que emplearse a fondo cunha gran estirada para poder evitar o gol das visitantes. O rechace foi aos pés de Julie Tavle que deu co seu tiro ao longueiro.
Aínda co medo no corpo prodúxose unha reacción inmediata das branquiazuis por medio de Athenea del Castillo cun disparo que atallou Pamela Tajonar.
Seguiuno tentando o EDF Logroño que mandaba pero non anotaba. Conseguiu por fin o equipo rioxano perforar a meta defendida por Noe Bermúdez, pero o fixo en fóra de xogo e o remate de Jade foi invalidado pola colexiada vasca Arregui Gamir.
Co 0-0 chegouse a o descanso. Antes Gaby tivo unha gran ocasión nos seus pés pero non chegou ao balón polos pelos.
Levánbanse consumidos apenas cinco minutos da segunda metada cando Athenea del Castillo enviaba un pase da morte a Alba Merino que remataba desviado.
Unha hora de xogo do #DéporABANCAEDFLogroño en Abegondo! Tralo xerro de auga fría, #asnosas levantan a cabeza buscando o empate con afán#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/w4FwrhWVCT
— RC Deportivo (@RCDeportivo) December 13, 2020
Cando se perdoa, xa se sabe, a lei do fútbol condena a recibir gol. Así foi no minuto 52 de xogo, cando un córner propiciaba o primeiro gol do EDF Logroño. Noe Bermúdez despexaba en curto o saque desde o curruncho, pero o balón quedou sen dona e Julie Tavlo aproveitou o lío para empuxar o esférico ao fondo das redes deportivistas (0-1).
As futbolistas que adestra Manu Sánchez non baixaron os brazos e foron aínda con maior ímpetu a polo partido. No 70 chegaría o empate por medio de Athenea que puxo maxia nas súas botas á hora de controlar o pase de Peke e acadou o premio de bater a Pamela Tajonar (1-1).
Un cuarto de hora para o asubío final do #DéporABANCAEDFLogroño en Abegondo!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/VlyvzhnLQR
— RC Deportivo (@RCDeportivo) December 13, 2020
A partir dese momento o EDF Logroño diluiuse e o Dépor ABANCA volveuse furacán. Dominaron as branquiazuis o xogo e mandaron con rotundidade sobre o verde de Abegondo. As deportivistas traballaban duro para atopar o tanto que precisaban para voltar a mandar tamén no luminoso. O esforzo obtivo o froito desexado no minuto 84.
Athenea del Castillo devolvía o ‘favor’ a Peke enviándolle un pase que a vasca transformaría no 2-1. A xogada empezou cun pase en profundidade de Lía a Athenea na banda dereita do ataque herculino. Esta mandouna rasa ao segundo palo para que Peke-gol marcase a pracer coa porteira xa batida.
Final do #DéporABANCAEDFLogroño en Abegondo, 2-1! Segunda vitoria seguida para #asnosas!#TocaVolverseMollar ⚽️ #UnÚnicoLatido 💙 #razónDÉcorazón pic.twitter.com/FYbw9SCAWL
— RC Deportivo (@RCDeportivo) December 13, 2020
Este triunfo serve ás galegas para abandonar o posto de colistas na Primera Iberdrola, cedéndolle o lugar, xusto ao EDF Logroño.
O Madrid CFF, seguinte rival do Dépor ABANCA
Mañá, luns 14 de decembro, as deportivistas poranse novamente ás ordes de Manu Sánchez. Están convocadas para unha sesión de recuperación ás 17:30 horas en Abegondo.
O Dépor ABANCA ten o seu seguinte partido fixado para o sábado 19 de decembro ás 13:00 horas. O rival será o Madrid CFF e a cancha o campo de Matapiñonera de San Sebastián de los Reyes.
FICHA TÉCNICA
DEPORTIVO ABANCA: Noelia Bermúdez, Cris, Ainoa, Blanco, Noelia Villegas, Iris, Arbeláez (Michelle Romero, min. 67), Alba Merino (Lía, min. 80), Gaby, Athenea e Peke.
EDF LOGROÑO: Tajonar, Caracas, Inés, Marta Cazalla, Leti, Vilakazi (Asantewaa, min. 64), Chini, Tavlo, Carol (Silvia Ruiz, min. 74), Olga García (Rebecca Guehai, min. 20) e Jade.
GOLES: 0-1 Tavlo (min. 52); 1-1 Athenea (min. 70); 2-1 Peke (min. 84).
ÁRBITRA: Arregui Gamir do Colexio vasco. Amosou cartón amarelo a Caracas (min. 36), Alba Merino (min. 41) e Ainoa (min. 90+1).
INCIDENCIAS: Partido correspondente á undécima xornada da Primera Iberdrola disputado na Cidade Deportiva de Abegondo con aforo limitado a 150 espectadores por mor da pandemia de COVID-19.
