O Dépor ABANCA non ten rival na casa. As branquiazuis xa estrearon o campo de Abegondo neste 2022 e o fixeron cunha vitoria ante o CD Parquesol (3-0).
As deportivistas manteñen así o seu pleno de vitorias como locais, e afianzan o seu liderado na Reto Iberdrola, onde son primeiras con 37 puntos.
Control deportivista
Malia o abultado do resultado, este encontro foi duro para as galegas, que tiveron que empregarse a fondo para facerse cos tres puntos do triunfo.
No once titular de Llorente María Sampalo disputaba a súa primeira titularidade na liga, despois de ter xogado só o partido de Copa da Raíña ante o Granada CF.
Desde o comezo, o Dépor ABANCA saiu con forza ao seu verde, apoiado pola afección desde a bancada. As primeiras ofensivas deportivistas non se farían esperar, cunha oportunidade de Adule no minuto 2. A porteira rival botou por terra a oportunidade, que recolleu Ainhoa Marín para pasarlle a Paula, tamén sen éxito.
Só cinco minutos despois abriríase a lata coruñesa, cun tanto de María Ruiz. Marín deixoulle á andaluza o balón de cara para que disparase, facendo entrar o esférico pola esquerda da gardameta do Parquesol.
Dominando o terreo de xogo, as xogadoras adestradas por Miguel Llorente traballaban buscando o segundo tanto. Porén, unha presión alta das visitantes impedía que a distancia aumentara no marcador.
Pouco antes do descanso, o Parquesol tivo preto o empate. As visitantes tiraron unha falta directa, pero o balón deu no travesaño. Minutos despois, Marta estivo preto de anotar, pero Sampalo soubo resolver para manter a vantaxe branquiazul.
Vitoria do Dépor ABANCA malia a presión visitante
O guion non sufriu moitas modificacións tras a reanudación, cun Dépor ABANCA dominando a posesión pero sen achegarse á meta contraria pola presión rival.
Non foi ata o minuto 69 cando Patri López logrou desequilibrar o duelo. A deportivista recolleu un balón solto na área tras o pase de Ainhoa Marín para anotar o 2-0. O último gol da tarde chegaría por parte da propia dianteira catalana, vital en todas as ocasións de gol da xornada. Marín faría o 3-0 final xa no minuto 75, cun chut raso.
FICHA TÉCNICA
DÉPOR ABANCA: Sampalo, Andrea Sierra, Inés Altamira, Raquel García, Cris, Paula Gutiérrez, Carlota (Jone Ibáñez, min. 68) (María Figueroa, min. 79), Adule (Aroa Guerra, min. 68), María Ruiz, Patri López (Alejandra Serrano, min. 79) e Ainhoa Marín.
CD PARQUESOL: Jimena, Rebeca (Hana, min. 74), Yipsy, Sheila, Sandra (María, min. 74), Iria, Marta (Regina, min. 66), Nomi (Ángela, min. 46), Sheri (Paula, min. 85), Elisa e Nata.
MARCADOR: 1-0 María Ruiz (min. 7); 2-0 Patri López (min. 69); 3-0 Ainhoa Marín (min. 75).
ARBITRAXE: Selina Álvarez Blanco (colexio galego). Ensinoulle a tarxeta amarela a Inés Altamira (min. 50), Sandra (min. 52), Adule (min. 59) e Raquel García (min. 90+1).
INCIDENCIAS: Partido correspondente á 15ª xornada do grupo norte da Reto Iberdrola, disputado en Abegondo ante 250 persoas.
