Galicia perde a un equipo na LF Endesa, a máxima categoría do baloncesto español. O BAXI Ferrol non competirá na división de ouro na vindeira tempada, tras certificar o seu descenso na última xornada (47-80).
As ferrolás recibían na Malata e ante a súa afección a un Embutidos Pajariel Bembibre tamén necesitado dunha vitoria para acadar a permanencia.
O plantel galego, minguado por varios casos de COVID-19 entre as xogadoras e o corpo técnico, deixouno todo sobre o parqué ferrolán sen éxito tras a súa fazaña.
A forza do BAXI quedou no inicio
Dispoñendo só de cinco xogadoras sénior no equipo, e cunhas rotacións extremadamente curtas, o BAXI Ferrol partía como perdedor neste último duelo da tempada.
Porén, as galegas deron un golpe na mesa no inicio do encontro, liderando o apartado anotador fronte as visitantes. Koenen, Grande, Gari, Cabrera e Swart foron claramente superiores durante os primeiros minutos de partido, coa 1 especialmente inspirada baixo o aro.
Un parcial inicial de 10-0 poñía en apuros ao conxunto visitante, que paraba o cronómetro para replantear o partido pasado o ecuador do primeiro cuarto. O técnico rival moveu o banco, apostando polos tiros exteriores para recuperar o terreo perdido, remantando o tempo nun 21-11.
No segundo cuarto, o impulso local comezaría a perder forza e o Bembibre iniciaba a súa remontada. Cun 0-15 tras a reanudación, as xogadoras visitantes facían saltar as alarmas universitarias. Case cinco minutos tardarían as galegas en anotar de novo, cun tanto de Carmen Grande que devolvía a esperanza á bancada.
As galegas mantiñan o pulso, pero o Bembibre salvaba a súa vantaxe. A bucina para o descanso sonaba tras un triplo para cada bando, co marcador anunciando o 30-33.
Malia ter toda a segunda parte para recuperar o resultado, o curto plantel do BAXI Ferrol non puido sacar máis forzas para facer fronte e un duelo vital.
Na segunda metade, as ferrolás foron inferiores ás rivais, sufrindo de inicio un parcial 0-12. Apostando polos tiros exteriores, o conxunto galego aferrábase ao partido, chegando ao cuarto final cun 39-55 no electrónico.
No tempo final, o encontro non mudou de guion, e o Bembibre puido festexar a costa do BAXI Ferrol a súa permanencia, rematando o partido nun 47-80.
Lino López: “Estou moi orgulloso”
Tras o partido, o adestrador Lino López pasou por rolda de prensa onde asegurou estar “moi orgulloso” do traballo do equipo. “Ás veces ganas moitos partidos e consegues titulos e ascensos e non quedas tan contento como nesta tempada co traballo que se fixo”, dixo en relación ao equipo, pero tamén o club e a afección.
Sobre o partido, o técnico destacou o esforzo titánico do seu plantel: “Xogar só con cinco xogadoras sénior na situación na que estabamos era moi complicado. Con todo, o equipo sacou coraxe e pelexou ata que deron as forzas”.
Esta actitude non se viu solo na última fin de semana na Malata, senón que foi unha constante ao longo da tempada. “O equipo sempre intentou dar o seu máximo, dan igual as circunstancias. Somos un equipo que nunca se queixou de nada. Tivemos infinidade de adversidades e problemas desde a pretempada ata o último partido de liga”, recordou Lino López.
Por iso, o preparador quédase “co que se viu ao final do partido. A ovación da xente, a afección implicada”. Máis aló da permanencia, o BAXI Ferrol partía con obxectivos como o de “enganchar á afección” ou “facer un xogo atractivo”, dúas metas logradas nesta tempada.
Así mesmo, Lino López sinalou que “houbo moitas xogadoras que evolucionaron individualmente, que iso tamén é unha das características que priman neste club, que as xogadoras se revalorizan e rematan facendo grandes tempadas”.
Rueda de prensa de @linolopez04 tras el partido BAXI Ferrol @UniFerrol 47 –
Embutidos Pajariel @CBBembibrePDM 80#SienteelUni pic.twitter.com/tXBUWMxijk— Baxi Ferrol (@UniFerrol) April 17, 2022
