A alero valenciana Irene Garí seguirá a próxima tempada vestindo a elástica do o BAXI Ferrol, co que cumprirá a súa terceira campaña na escuadra departamental.
A xogadora valenciana xogou un papel importante no equipo de hai dúas tempadas conseguiu o ascenso á Liga Endesa, na que tivo menos protagonismo o ano pasado e agora espera poder axudar ao equipo ferrolán a tratar de volver á máxima categoría do baloncesto feminino español.
Irene coñece a maneira de traballar de Lino López e iso é importante á hora de achegar ao grupo que se está formando para poder axustarse canto antes, xa que, polo momento, só ela e Jenna Allen continuarán da pasada campaña.
Irene Garí: “Teño ganas de volver á Malata”
A xogadora comenta que “teño moitas ganas de empezar a tempada, volver á Malata e sentir a forza da afección”.
Pola súa banda, o técnico, Lino López, comenta sobre a xogadora valenciana que “Irene será o seu terceiro ano consecutivo no club, xa coñece a nosa forma de adestrar e de xogar e será importante o seu traballo para o axuste do resto de xogadoras. Ela foi unha peza importante no ascenso a Liga Endesa, é das xogadoras que máis adestra do equipo facendo traballo extra e querendo ser mellor cada día”.
Ademais, o preparador engade que “no que respecta ao xogo é unha xogadora polivalente, que axuda moito no rebote e xogo sen balón e con moi bo tiro a media e longa distancia, co perfil que buscamos de xogadora que busca o mellor para o equipo”.
Desta forma, coa renovación de Irene Garí o equipo xa dispón de seis xogadoras tras anunciar á finlandesa Marianne Kalin, á americana Jenna Allen, ás hispano-arxentinas Andrea Boquete e Julieta Mungo e á cántabra Marta Gómez.
Campaña de abonados
Ademais, segue aberta a campaña de abonados para poder renovar ou darse de alta. Polo momento, renovaron o seu abono 326 persoas, mentres que se produciron 41 altas, o que fai un total de 367 persoas.
Todas as persoas interesadas poden pasarse pola Taberna Arauxa, no Cantón de Molins 6, de martes a domingo de 12.00 a 22.00 horas. Tamén se poden facer as xestións a través do correo electrónico abonadosuniferrol@gmail.com.
