Entrepot Naval sóbese ao barco do Atlético Guardés. A empresa viguesa convértese por primeira vez en patrocinadora do club da Guarda. A imaxe da citada empresa xa loce na parte traseira dos novos equipamentos do club galego que milita na máxima categoría feminina xunto co Conservas Orbe Rubensa BM Porriño.
Segundo explican desde o Atlético Guardés, “Entrepot Naval SL leva desde 1998 aprovisionando con víveres, tabaco, cebo e efectos nava-lles, entre outros, a buques de pesca, oceanográficos, mercantes ou transatlánticos. Agora, a empresa viguesa aposta por dar sustento ao Club Balonmán Atlético Guardés convertíndose en patrocinadora da entidade deportiva”.
Explican desde o club de A Guarda que logo da chegada de Electrónica Eutimio SL hai unhas semanas, “o club que preside Jesús López celebra presentar un acordo fraguado ao comezo da pretemporada. Un apoio que xa se luciu o sábado no primeiro partido da liga Guerreras Iberdrola ao portar a imaxe corporativa de Entrepot Naval na parte inferior traseira da camiseta oficial da tempada 20-21. A presentación contou coa presencia do persoal de División de Honra, representantes da directiva do club e da empresa viguesa”.
O presidente do Guardrés, Jesús López, agradecido ao patrocinador
Unha incorporación máis ao equipo de patrocinadores privados do club. “alégranos poder anunciar e pór cara para poder recoñecer o apoio tan importante que estamos encontrando en empresas como Entrepot Naval“, recoñece o presidente López.
O acto de presentación transcorreu en ton distendido nas instalacións da empresa en Zona Franca de Vigo. “Moitísimas grazas por apostar por nós, oxalá sexa o primeiro ano de tantos que podamos contar con Entrepot Naval como patrocinador”, afirmou alí López.
Ademais, o máximo mandatario da entidade valorou de maneira “especial” que “neste contexto de incertidume para todos o deporte siga atopando as portas abertas en moitas empresas”, agradeceu. De igual modo manifestou unha vez máis o seu agradecemento ao equipo directivo do club “que está a facer un enorme traballo contactando con empresas de Galicia e que tamén se moven a nivel nacional”.
Pola súa banda, desde Entrepot Naval confesaron que lles gusta “fomentar o deporte e axudalo co noso pequeno gran de area” e ver como ao mesmo tempo poden presumir de que a súa imaxe “luza na camiseta do Club Balonmán Atlético Guardés en todos os seus desprazamentos e partidos”, en relación á repercusión que terá esta unión.
Ninguén quixo perderse a presentación e por parte de Entrepot Naval estiveron presentes: Luís San Pedro Ainse, Enrique Fernández Acuña, Israel Pastor Rodríguez, Martina San Pedro Acuña, María Esther Pérez Díaz, Jimena González Rúa, Pablo Villar Fernández, Víctor Núñez Seoane e Sabela San Pedro Acuña.
Do mar ás pistas
Entrepot Naval pásase do mar ás pistas deportivas para dar o seu apoio ao Atlético Guardés. A empresa, fundada en 1998 dedícase ao aprovisionamento de víveres a buques de pesca, oceanográficos, mercantes ou transatlánticos.
Ademais, tamén facilitan aos barcos todo o que necesitan para pescar (anzois, redes, pelotas, etc). Por último, cabe mencionar que a empresa viguesa sita en Zona Franca posúe licenza de exportación e importación para calquera parte do mundo e nas súas instalacións cárganse e descargan toda clase de contedores para os buques de pesca para a zona onde estea o barco (Cabo Verde, Montevi-deo, Azores, Australia, Walvis Bay, Durban e Perú).
Entrepot Naval SL chega ao Guardés para reforzar ao equipo de patrocinadores privados cos que conta a entidade. Despois da presentación de Electrónica Eutimio SL, confírmase un novo apoio e proximamente iranse anunciando máis novidades nesta parcela.
A imaxe da empresa viguesa loce xa nos equipamentos (parte inferior traseira) que todas as categorías do club vestirán esta tempada. O equipo de División de Honra vestiraas na liga Guerreras Iberdrola 20-21, Copa da Raíña 20-21 e EHF Challenge Cup.
Ademais, en Entrepot Naval verán a súa imaxe presente en cartelaría oficial do club ou streaming dos partidos oficiais, onde se promedian unhas 3.000 visualizacións.