O 2020 non está a ser un ano fácil para os clubs de fútbol galego e, por este motivo, a Real Federación Galega de Fútbol (RFGF) anuncia que ofrecerá “unha liña de axudas especial para todos os equipos que compitan e que teñan licencias tramitadas. Esta subvención cubrirá o 100% dos fastos da póliza do Seguro de Responsabilidade Civil”.
Segundo informa a RFGF, en total, destinarase unha cantidade “de entre 150 e 200 mil euros, segundo o número de clubs participantes, o que suporá un aforro medio de 190 euros para cada equipo”.
“Todos aqueles clubs non profesionais con actividade e licenzas tramitadas e que estean adheridos ou se adhiran á póliza contratada pola Federación poden acollerse á axuda”, aseguran desde a federación galega.
Todas estas entidades prestadoras de servizos deportivos deben contar co Seguro de Responsabilidade Civil, obrigadas pola Lei 3/2012 do 2 de abril do Deporte de Galicia. O seu incumprimento conleva unha multa de ata 60.000 euros e as Federacións deben velar polo seu cumprimento.
Por isto, desde o 2016, a Real Federación Galega de Fútbol, contratou, previo concurso público, unha póliza colectiva de Responsabilidade Civil. Segundo explica o organismo, “estas son unhas coberturas e cotas de adhesión moi competitivas, que reducen ata un 50% o custo habitual das pólizas individuais, á que se adheriron voluntariamente ata a data máis de 500 clubs”.
A subvención da Federación é para o ano natural do 2021
Ante a excepcional situación vivida este 2020 pola pandemia de COVID-19, coas dificultades económicas que conleva, a Xunta Directiva da Federación acordou financiar con recursos propios toda unha liña de subvención.
Estas axudas serán para o ano natural 2021 e están destinadas aos clubs xa adheridos á poliza e aos que se adhiran desde este momento, mediante o formulario da web oficial da RFGF e debe ser enviado pola Intranet.
