Pontevedra activa oficialmente a conta atrás de cara á gran cita do venres en Pasarón coa Selección Española. Inaugurouse a exposición “A viaxe cara á estrela” na capital do Lérez, escenario que acollerá o quinto partido da Selección Española na UEFA Women’s Nations League o próximo venres 1 de decembro contra Italia.
Esta mostra ao aire libre, que xa loce na entrada do Edificio Castelao, percorre o camiño que o combinado nacional tivo que facer na Copa do Mundo de Australia e Nova Zelandia 2023 ata alzar o trofeo e bordar esa estrela no peito que tanto ansiaba.
Ao evento asistiron Rafael Louzán, presidente da Real Federación Galega de Fútbol; Valentín García, secretario xeral de Política Lingüística da Xunta de Galicia; e Rafael Domínguez, vicepresidente da Deputación Provincial de Pontevedra.
Esta viaxe queda plasmada en 17 fotografías que retratan momentos de alegría, anguria e emoción, centrándose non só no plano deportivo, senón tamén nos momentos máis persoais, reflectindo ese lema que sempre acompaña á Selección Española: “Xogar, loitar e gañar”.
“É o evento do ano en Pontevedra”, di Louzán
O presidente da RFGF, Rafael Louzán, amosou a súa satisfacción durante a inauguración da exposición. “Coa inauguración desta mostra activamos oficialmente a conta atrás para o partido do venres. Estamos a falar do evento do ano en Pontevedra, unha cidade que respira deporte polos catro custados, pero sabemos que a visita da campioa do Mundo a esta cidade é un acontecemento histórico”.
Ademais, Louzán quixo agradecer “á Deputación Provincial de Pontevedra pola súa aposta. Cando lles trasladei a posibilidade de traer á Selección Española aquí puxéronse ao choio e non o dubidaron en ningún momento”.
En canto á acollida masiva e o éxito na venda de entradas, o presidente da RFGF afirmou que “será, sen dúbida, a gran festa do fútbol feminino galego. Todas as nenas federadas de Galicia que quixeron estar, van estar o venres en Pasarón. Para todas elas será un soño e desde aquí tamén podemos presumir do enorme crecemento que experimentou o fútbol feminino na nosa comunidade”.
Por último, Louzán fixo referencia a Abelleira, a xogadora lerezana que o venres cumprirá un soño. “O soño que vai vivir Teresa Abelleira. Unha xogadora que seguramente nunca se puido imaxinar poder xogar na súa casa, ante a súa familia e amigos e como campioa do Mundo”.
O vicepresidente da Deputación de Pontevedra, Rafael Domínguez, apuntou que “cando o presidente Rafael Louzán trasladoume esta posibilidade tivémolo moi claro: a Selección Española campioa do Mundo ten que vir a Pontevedra, e máis tendo como peza crave a unha xogadora de aquí como Teresa Abelleira“.
A Fan Zone desembarca a fin de semana en Pontevedra
A idea para transmitir é que “a Copa do Mundo 2023 é froito do traballo realizado ao longo de moitos anos coas categorías inferiores da selección. Para iso habilitouse un muro exento dobre con potentes imaxes da consecución deses tres títulos. A copa do Mundo da absoluta irá exenta nunha das caras do muro, mentres que as outras dúas copas, tamén exentas, coas súas peanas e vitrinas correspondentes. Esta montaxe ocupará un espazo central dentro da carpa da Fan Zone que estará en Pontevedra os días 25 e 26 de novembro”, explican desde a RFGF.
A afección poderá fotografarse coas copas do Mundo das seleccións femininas Absoluta, Sub-20 e Sub-17, sendo estes os trofeos orixinais.
A Fan Zone estará situada na Avenida Montero Ríos (diante da Deputación Provincial) e estará operativa durante esta fin de semana (sábado e domingo) sendo a inauguración este sábado ás 12, coa colocación da copa do Mundo gañada en Australia na peana na que estará exposta toda a fin de semana.
