Chega a oitava xornada á Primera División Femenina de voleibol e con ela dúas saídas para as xogadoras galegas o sábado, 28 de novembro. Esta fin de semana Calasancias Coruña enfrontaránse a un rival directo, o Universidad de Salamanca ás 17:00 horas; mentres que as, polo de agora, subcampioas, o Aceites Abril CVO busca afianzar a súa posición ante o Fertiberia Los Campos ás 19:00 horas. Esta fin de semana, o CV Bruxas descansa.
Este partido será esencial para o conxunto coruñés. Despois de lograr unha soa vitoria, que lle outorgou os tres puntos que ten agora, o Calasancias ocupa a penúltima posición.
Xusto por riba delas, e coa mesma puntuación, está o Universidad Salamanca, que de seis partidos solamente venceu un. As herculinas precisan unha vitoria, non só para abandoar a parte baixa da táboa, senón tamén para impoñerse a un rival directo na competición.
Un obxectivo moi distintos do que teñen as ourensás. O combinado do Aceites Abril ocupa a segunda posición ao fallar soamente nun dos seis encontros que disputou. As galegas viaxan a Asturias para enfrontarse ao Fertiberia Los Campos con confianza, despois dunha merecida vitoria ante o CV Astillero na xornada anterior.
A tan só catro puntos por riba do Aceites Abril está o líder, o CV Oviedo. A final da primeira volta de liga achégase e o conxunto dirixido por Pablo Pérez aspira a lograr arrebatarsela.
Pola súa banda, o equipo de Avilés que recibe ás galegas ten aínda tres partidos sen disputar a causa da COVID-19. Unha vitoria será fundamental para elas, que manteñen a intención de quedar entre os primeiros postos da clasificación.
Prevese que este duelo, que se poderá seguir nas redes sociais do @voleyourense en Facebook e Instagram, sexa moi igualado, polo que ser capaces de manter o ritmo durante todo o xogo será chave para levarse a vitoria.
