Vitoria moi valiosa do Dépor nunha mañá no que o vento foi protagonista na Cidade Deportiva de Valdebebas. Máis forte sopraron as xogadoras galegas para levarse os tres puntos ante o CD Tacón e seguir na zona alta da táboa. O fútbol debíalle unha ás galegas tras o duro golpe do pasado mércores en Copa fronte o Barça e devolveulla cun partido dos que non se esquecen con facilidade.
O fútbol ten cousas máxicas como as que aconteceron esta mañá. O Deportivo ABANCA perdía 3-0 no minuto 80 e cando todo parecía perdido e avocado a unha vitoria do Tacón as meigas do fútbol volveron saír para dar unha remontada épica e os tres puntos as herculinas.
Once de gala o que sacou Manu Sánchez na Cidade Deportiva de Valdebebas a pesar das importantes baixas coa que contaba o adestrador galego. O mister galego volveu ao seu clásico 1-4-3-1-2 en rombo tras o partido de Copa. Debido ás baixas en lugar de Athenea xogou Michelle Romero acompañando a Peke e Arbeláez fixo de Alba Merino na medular. A súa compatriota, Bedoya, tamén foi da partida no eixo da zaga.
O Dépor arrancou con ganas de sorprender e de levarse os tres puntos a terras galegas. Xa no minuto 10 acumulaba varias chegadas de perigo sobre todo unha de Peke moi clara que rematou a bocaxarro na área pequena e tivo unha gran resposta por parte de Yohana.
Co paso dos minutos o Tacón íase quitando o perigo e lanzando contras con máis intención que perigo. As galegas seguían dominando e marcando o ritmo do encontro, como acostuman, pero tampouco lograban poñer en serio perigo a gardamallas, Yohana.
Ambos equipos seguían medindo a súas forzas e cando estaba a punto de marcar o minuto 40 no luminoso, chegaba o gol das locais. Jakobsson recibía en banda dereita e buscou un centro que acabou nas botas de Kaci dentro da área. Tras perfilarse para a súa perna boa disparou coa destra e bateu a Sullastres cun gran disparo cruzado. Gran partido que estaba a completar a xogadora francesa do Tacón na medular con moitos robos de balón e puxo a guinda a unha gran primeira parte con este gol.
Con 1-0 e con sensacións encontradas no conxunto galego chegaríase ao descanso. Bos 45 primeiros minutos das branquiazuis dominando e levando o control pero faltou profundidade en ataque e contundecia en defensa no gol recibido.
Tras os 15 minutos de refresco, o vento soprou en contra e costoulle ao conxunto deportivista entrar de novo no partido. O Tacón subiu un punto a liña de presión e difcultou a saída de balón das galegas. O conxunto de David Aznar plantou un bo entramado defensivo e acumulou xogadoras na medular para tentar roubar e aproveitar a velocidade da sueca Jackobsson.
SúperSullastres vol.II
No minuto 68 a propia xogadora sueca tivo nas súas botas sentenciar o partido pero apareceu, unha xornada máis, a figura de Esther Sullastres para salvar ao seu equipo. Xa na primeira metade tivo unha gran intervención e nesta ocasión fíxose moi grande ante a dianteira sueca e sacou un pé providencial para salvar o 2-0.
Yohana quixo facer a réplica para evitar o empate e atallou unha gran oportunidade de gol para as galegas por medio de Michelle Romero. A venezolana plantouse libre de marca na área madrileña e tras recortar a súa marca rematou de zurda pero atopouse coa figura da gardamallas local.
Tras estas dúas ocasións claras de gol, chegaría o segundo do Tacón para poñer a facenda moi complicada para as de Manu Sánchez. Tras lanzamento de córner no minuto 73 o balón caía nas botas de Lorena Navarro e a xogadora zurda empalaba moi ben o coiro para meter un gran gol de volea ante o que pouco puido facer Sullastres.
O que parecía a sentencia chegaría tan só cinco minutos despois cun erro de Sullastres no que o vento xogou unha mala pasada á gardamallas das galegas. Jackobsson disparou desde a frontal do área e tras botar o balón fixo un estraño polo forte vento e introduciuse no fondo das mallas das galegas. 3-0 no luminoso pero o mellor estaba por suceder.
Vendaval de goles
Cando xa parecía todo resolto, dous goles en dous minutos volveron a meter ao Dépor no encontro. Maya recortou distancias tras unha conducción de Peke que cedeu á nipona e esta disparou e o balón entrou chorando ante o esforzo sen éxito de Yohana por evitar o gol.
As meigas sobrevoaban as Cidade Deportiva de Valdebebas e dous minutos máis tarde foi o turno da venezolana Michelle Romero anotando dous tantos consecutivos. No primeiro, gañou a espalada da zaga do Tacón e tras un gran disparo cruzado meteu o medo as madrileñas. O segundo foi nunha situación similar pero plantouse diante de Yohana e tras un gran caneo marcou a pracer para poñer as táboas no marcador.
Kika fixo estoupar de alegría a toda a parroquia galega tras un golazo desde a frontal da área para pechar unha remontada que quedará nas retinas dos deportivistas durante moito tempo. Remontada e vitoria das que reforzan e das que é moi difícil explicar. Cousas de meigas.
FICHA TÉCNICA
CD TACÓN: Yohana, Daiane, Babett Peter, Thaisa, Kaci, Asllani (58′), Jakobsson, J.Martínez (73′), Esther, M. Martín, Ainoa. Suplentes: Ezquerro, Ortiz, Prieto, Ubogagu, Lorena (58′), Suárez, Ari (73′).
DEPORTIVO ABANCA: Sullastres, Cris, María Méndez, Bedoya, Nuria (72′), Iris (77′), Arbeláez (72′), Tere, Gaby, Michelle Romero, Peke. Suplentes: Misa, Miriam, Kika (72′), Maya (77′), Villegas (72′).
GOLES: 1-0 Kaci (minuto 40), 2-0 Lorena Navarro (minuto 73), 3-0 Jackobsson (minuto 79), 3-1 Maya (minuto 81), 3-2 Michelle Romero (minuto 83), 3-3 Michelle Romero (minuto 88), 3-4 Kika (minuto 90).
INCIDENCIAS: Partido correspondente á 22ª xornada da Liga Iberdrola disputado ás 12:00 h. na Cidade Deportiva de Valdebebas (Madrid).
