Non hai rival pequeno e nada parece doado nesta Primera Federación futfem da RFEF na que o Dépor ABANCA colle e deixa o liderado, ou sube e baixa na táboa, como quen desfolla unha margarida. Logo de caer derrotadas no campo do SE AEM (1-0), as galegas caen á cuarta praza. Barça B, Cacereño e SD Eibar están por diante das coruñesas. Pero como o cumio da táboa está nun pano, nada está decidido e todo muda semana a semana.
Din que hai unha primeira vez para todo e neste caso a primeira vez das Nosas non foi por algo bo. Nesta vixésima xornada da competición as futbolistas que adestra Irene Ferreras perderon por primeira vez dous partidos seguidos. Segunda derrota consecutiva e de novo pola mínima se lle van os tres puntos ao Dépor ABANCA.
A primeira metade tivo cor branquiazul en canto a dominio do partido, aínda que as ocasións claras de gol brillaron pola súa ausencia en ambas as áreas.
O Dépor ABANCA comezou moi ben o partido. Nas botas de Ainhoa Marín armouse unha ocasión de ataque aos dous minutos de partido. Pero Laura Martí, a porteira local, chapou o esférico e todo quedou en nada.
Moita posesión pero pouca ocasión deportivista
Suponse que o control do esférico, o dominio do xogo, e a posesión rematan por facer xermolar ocasións para quen posue todos esos ingredientes nun partido de fútbol. Pero non sempre pasa así. O ataque deportivista era morno. Sen forza. E o gol, o grande premio deste deporte, non chegaba.
Media hora do #AEMDéporABANCA! pic.twitter.com/gGIeqxd6q9
— RC Deportivo (@RCDeportivo) February 11, 2023
Por dar un dato, pasaron máis de 30 minutos para que o conxunto que adestra Irene Ferreras volvese lanzar un tiro entre os tres paus. Foi Cris, e volveu aparecer Laura Martí. Desta volta mandou o esférico cara ao curruncho. Nese lanzamento de córner Millene disparaba e o seu intento petaba co exterior da rede.
A cinco minutos do final chegaría a ocasión máis clara das herculinas. Carlota Sánchez aproveitou un erro da porteira local (que repelía un centro de Laura Fernández), e chutou a porta. A mala sorte fixo que o seu disparo petase no corpo da gardameta local.
Xa no segundo acto o SE AEM avisaba de que non ía ser un convidado de pedra na súa propia casa e facía traballar a Lucía que desvía o xusto para que a pelota pete no traveseiro. Aviso das locais: Ollo, coidado, non tiran a porta so as galegas. Aquí xogamos todas.
Seguiuno tentando o Dépor ABANCA con chegadas de Ainhoa Marín ou Raquel García. Pero Laura Martí tiña o día e as deportivistas, non.
🔁 #AEMDéporABANCA: dobre cambio n #asnosas no minuto 67, Eva Dios e Sara Navarro entran no lugar de Carlota Sánchez e Laura Fernández pic.twitter.com/I4QLQjuo9N
— RC Deportivo (@RCDeportivo) February 11, 2023
Buscando sacudir a árbore, Irene Ferreras introduciu cambios no minuto 67 coa entrada de Eva Dios e Sara Navarro que colleron os sitios de Laura Fernández e Carlota Sánchez. O dobre cambio non trouxo consigo modificacións tácticas nin deu como resultado o ansiado gol.
O gol do SE AEM
Preto do final do partido, no minuto 84 chegou o gol do SE AEM. Foi após unha xogada individual de Patri Teixidó no extremo esquerdo con pase á media lúa para chegada desde atrás de Andrea Gómez, que empalmou un potente dereitazo diante do que a gardameta do conxunto coruñés, Lucía, non puido facer nada.
Non tirou a toalla o Dépor ABANCA. Buscou o equipo galego un xogo máis directo pero nada. Bueno, as nosas deportivistas chegarona a notar pero o gol foi anulado por man. O SE AEM controlou ben os minutos finais e conseguiu quedar cos tres puntos.
Final do #AEMDéporABANCA, 1-0! pic.twitter.com/1dCdrR4HPe
— RC Deportivo (@RCDeportivo) February 11, 2023
FICHA TÉCNICA
1) SE AEM: Laura Martí, Gema Ginés, Iris, Jeni, Cristina, Anita, Laura (Gema Arrabal, min. 65), Andrea Gómez, Patri Teixidó, Yiyi e Mariajo (Meritxell, min. 90+1).
0) DÉPOR ABANCA: Lucía, Cris, Inés Altamira, Raquel García, Monteagudo, Letti, Henar, Ainhoa Marín, Laura Fernández (Eva Dios, min. 67), Carlota Sánchez (Sara Navarro, min. 67) e Millene.
GOL: 1-0 Andrea Gómez (min. 84).
EQUIPO ARBITRAL: Ane Asla Borrallo do colexio vasco. Amosou cartón amarelo a Laura Fernández (min. 51), Gema Arrabal (min. 76) e Cristina (min. 81).
INCIDENCIAS: Partido correspondente á 20ª xornada da Primera Federación FutFem da RFEF disputado no campo municipal de Recasens (Lleida).
