A Escola Galega de Adestradores da Real Federación Galega de Fútbol (RFGF) continúa apostando pola formación e ofrece agora a opción de acceder ao Curso de Adestrador/a Profesional de Fútbol – Nivel 3 que impartirá na cidade da Coruña.
Tal e como lembran desde a federación “en xaneiro comezaron 22 cursos anuais UEFA B e UEFA A de Fútbol, Nacional A e Nacional B de Fútbol Sala e o curso de máximo nivel Adestrador Profesional-Nivel 3 en Pontevedra. Ademais, este luns 15 de xaneiro arrincou o terceiro curso Licenza UEFA C e Nacional C de Fútbol Sala de xeito semipresencial con máis de 200 alumnos”.
A Escola Galega de Adestradores que dirixe Iván Cancela quere máis e volve á carga convocando outro curso de máximo nivel, o curso de Adestrador Profesional – Nivel 3, desta vez na Coruña. O curso volve facerse na cidade herculina despois de oito anos, xa que o último que se fixo na Coruña data do ano 2013.
O diploma de Adestrador Profesional (antigo Nivel 3) é unha titulación que constitúe o nivel máis alto e coa que os seus posuidores teñen acceso aos bancos de todas as categorías do fútbol, tanto en España como no estranxeiro.
Este curso de adestrador/a de fútbol terá lugar de marzo a agosto
A actividade formativa desenvolverase desde o mes de marzo e estenderase ata o mes de agosto. En canto ao horario, a formación terá lugar os luns e mércores de 18 a 23 horas e algúns sábados de 9.30 a 14.30 horas. Este ano, debido as circunstancias derivadas da COVID-19, vai ser un curso diferente e adaptado ás directrices que se marcan desde as autoridades sanitarias. A Escola non quere perder a esencia e continuará centrando todos os seus esforzos na calidade da formación dos alumnos, pero baixo unhas medidas sanitarias que nos permitan celebrar o curso nun entorno seguro.
Así, durante os meses de marzo e abril, vaise poder seguir nunha plataforma que a Escola poñerá a disposición dos alumnos, para despois finalizar o curso de forma presencial ata o mes de agosto.
A Escola ofrece así a posibilidade de obter o diploma de máximo nivel reducindo notablemente a duración presencial habitual da formación necesaria para a obtención desta titulación. A Escola de Adestradores responde deste xeito á demanda dos moitos técnicos interesados na zona da Coruña.
Segundo informa a RFGF as partes das que consta o curso tanto na plataforma virtual, como na parte de formación presencial como na parte de Aprendizaxe Baseado na Realidade (ABR) son as seguintes:
- Formación virtual: Comezará en marzo e levarase a cabo desde a plataforma de formación da Real Federación Española de Fútbol (Misquad).
- Formación presencial: Cando remate a parte virtual levarase a cabo a parte presencial, a partir de maio, os luns e mércores de 18 a 23 horas e algún sábados de 9.30 a 14.30 horas.
- ABR (Aprendizaxe Baseado na Realidade): Os alumnos e alumnas deberán de completar o ABR (prácticas nun club) exercendo de adestrador en clubes federados da RFGF. Os alumnos poderán tramitar licenza federativa como adestradores desde o inicio do curso.
Informa a RFGF que o prezo do curso é de 1.500€ e para matricularte nos cursos (o prazo está aberto ata o próximo día 24 de febreiro) hai dúas opcións:
Se xa eres alumno da Escola e tes as claves da Intranet:
- Accede a túa intranet coas claves da Escola (se non as lembras podes pedilas no correo escueladeentrenadores@futgal.es).
- Desde a “ficha do alumno” – “solicitar novo curso” selecciona o curso.
- Se non podes solicitar o curso que queres contacta coa Escola.
- Adxunta a documentación requerida desde “adxuntar documentación”.
Se NON eres alumno da Escola e NON tes as claves da intranet:
- Accede á páxina web da RFGF (futgal.es).
- Pica en Adestradores – Escola – Inscrición Online.
- Graba os teus datos e en curso a solicitar indica o curso.
- Confirma no teu correo a inscrición e accede á túa Intranet.
- Adxunta a documentación requerida dende “adxuntar documentación”.
