O proxecto “FUTGAL nas escolas” xa está en marcha no Concello de Culleredo (en concreto nos institutos IES Eduardo Branco Amor e IES Rego de Trabe, e no CIFP Universidade Laboral) e no Colexio Liceo La Paz. Trátase dunha iniciativa pensada por e para as e os máis novas/os co obxectivo de achegar o mundo do fútbol, da arbitraxe e da figura dos adestradores/as aos centros educativos de Galicia.
A Real Federación Galega de Fútbol (Futgal), da man da delegación coruñesa do Comité Técnico Galego de Árbitros de Fútbol que dirixe Rubén Eiriz, deu o pasado venres o primeiro paso para dar a coñecer e presentar esta iniciativa pioneira. Os primeiros en sumarse a esta iniciativa foron o Concello de Culleredo e o emblemático colexio Liceo La Paz da Coruña, o centro educativo con máis alumnos/as de Galicia.
Que é “FUTGAL nas escolas”?
O proxecto educativo “FUTGAL nas escolas” é unha idea que nace na delegación coruñesa de árbitros. Trátase dunha iniciativa pioneira que achegará a figura do fútbol, da arbitraxe e do Comité Galego de Adestradores aos concellos de Galicia e ás súas escolas, buscando a práctica do deporte por igual entre nenos e nenas e á área de mocidade dos concellos achegando a posibilidade de inserción na Federación, creando unha liga interna escolar e unha bolsa de arbitraxe/adestradores en nivel de acceso.
En cada centro educativo no que desembarca este proxecto “FUTGAL nas escolas” formaranse un árbitro e adestrador por clase, e os equipos serán mixtos buscando a verdadeira integración de nenos con nenas.
Tres institutos de Culleredo, primeira parada
O Concello de Culleredo, co seu alcalde José Ramón Rioboo á cabeza, foi o primeiro en abrir as súas portas de par en par para dar a benvida a este proxecto que xa comezará a funcionar nos institutos IES Eduardo Branco Amor e IES Rego de Trabe, ademais de no CIFP Universidade Laboral.
Á sinatura deste importante convenio, que tivo lugar nas instalacións do propio consistorio, asistiron o presidente da RFGF, Rafael Louzán; o presidente do Comité Técnico Galego de Árbitros de Fútbol, Bernadino González; o presidente do Comité Galego de Adestradores, Iván Cancela; o vicepresidente do CTGAF, Roberto Vázquez Alvite; o secretario do CTGAF, Noel Blanco; e o delegado dos árbitros na Coruña, Rubén Eiriz.
Por parte do Concello de Culleredo estiveron presentes o seu alcalde, José Ramón Rioboo, o concelleiro de Deportes, Miguel Suárez; e o concelleiro de Xuventude, Abraham Seijas.
Todos os presentes coincidiron na importancia que supón esta nova alianza entre a RFGF e o Concello de Culleredo e uniron forzas para continuar traballando en futuros proxectos. A sinatura do convenio rematou co intercambio de obsequios entre a RFGF, o CTGAF e o propio Concello de Culleredo.
Na Coruña súmase o Colexio Liceo La Paz
O proxecto “FUTGAL nas escolas” tamén desembarca no centro educativo con máis alumnos/as de Galicia. O Colexio Liceo La Paz ubicado na Coruña tamén abriu as súas portas para dar cabida a esta iniciativa. Cómpre lembrar que neste emblemático colexio xa se imparte con moito éxito a materia de arbitraxe desde hai media década grazas ao convenio entre o centro e a delegación coruñesa de árbitros.
Ao acto de benvida, que tivo lugar nun dos salóns de actos do centro, asistiron o presidente da RFGF, Rafael Louzán; o presidente do Comité Técnico Galego de Árbitros de Fútbol, Bernadino González; o presidente do Comité Galego de Adestradores, Iván Cancela; o secretario do CTGAF, Noel Blanco; e o delegado dos árbitros na Coruña, Rubén Eiriz. Por parte do centro educativo asistiron un grupo de alumnos e o director académico, Martín López.
A xornada no colexio rematou cun acto simbólico, o saque de honra que realizou o presidente da RFGF, Rafael Louzán, no primeiro partido da liga escolar interna na que impartiu xustiza un colexiado alumno do centro.
