O Concello da Coruña segue apostando por achegar o deporte á cidadanía e para a época estival o fai a través de ‘Coruña en forma’. O programa, de carácter aberto e gratuíto, responde á demanda das persoas usuarias das Escolas Deportivas Municipais, que suspenden a súa actividade entre xullo e setembro.
Para participar nestas actividades físicas e recreativas, as persoas interesadas non precisan inscribirse nin pedir cita previa. Os eventos adaptaranse á normativa sanitaria, e están abertos a todas as idades. ‘Coruña en forma’ engádese á lista de iniciativas deportivas como a celebración do Día do deporte na cidade e o programa Coruña no mar.
O obxectivo do Goberno local, tal e como indicou a concelleira de Deportes, Mónica Martínez, é promocionar a adquisición de hábitos de vida saudables, o abandono do sedentarismo e a ocupación saudable do tempo de lecer.
‘Coruña en forma’ chega a todos os puntos da cidade
‘Coruña en forma’ conta coa colaboración de Sanbrandán e comeza a funcionar este domingo, 11 de xullo. A intención é ocupar espazos públicos durante os meses de xullo, agosto e setembro e convertelos en instalacións deportivas non convencionais.
Así, as actividades físicas moderadas ocuparán parques, rúas, paseos e prazas da cidade, sempre baixo a supervisión de profesionais debidamente formados.
As zonas de actividade son o Barrio das flores, miradoiro do Matadoiro, parque de Vioño, parque Europa, praia de Riazor, área canina do parque de Eirís, pista de patinaxe de Durmideiras, San Andrés e a cidade deportiva A Torre-Arsenio Iglesias.
As actividades programadas de luns a venres son ximnasia aeróbica, taichí, zumba, pilates, ioga, marcha nórdica, maiores en forma e tonificación. Como novidade, nesta edición programaranse actividades durante a fin de semana e aproveitarase a peonalización da rúa de San Andrés para levar a ese punto actividades como roller mix en patíns, axilidade canina, rutas nocturnas ou rutas temáticas en patíns e deporte adaptado.
Tamén haberá polo parque escultórico da Torre de Hércules andainas de ida e volta entre Riazor e Bens, Riazor e a Torre de Hércules, San Andrés e O Parrote (pasando pola Torre de Hércules), praza de Ourense e parque de San Diego e a ruta dos tres parques (Torre, San Pedro de Visma e Bens).
A información dos horarios e os lugares de cada actividade pódense consultar na web da Concellería de Deportes:
| LUNS | MARTES | MÉRCORES | XOVES | VENRES | |
| 10:00 a 11:00 | Ximnasia aeróbica – Praia de Riazor Taichi – Parque de Vioño | Ioga – Miradoiro de Matadoiro Maiores en forma – Praia de Riazor | Ximnasia aeróbica – Praia de Riazor Taichi – Parque de Vioño | Ioga – Miradoiro de Matadoiro Maiores en forma – Praia de Riazor | Ximnasia aeróbica – Praia de Riazor Taichi – Parque de Vioño |
| 11:00 a 12:00 | Zumba – Praia de Riazor | Zumba – Praia de Riazor | Zumba – Praia de Riazor | ||
| 11:30 a 12:30 | Pilates – Parque de Vioño | Ioga – Parque Europa Maiores en forma – Barrio das Flores | Pilates – Parque de Vioño | Ioga – Parque Europa Maiores en forma – Barrio das Flores | Pilates – Parque de Vioño |
| 12:00 a 13:00 | Taichi – Praia de Riazor | Taichi – Praia de Riazor | Taichi – Praia de Riazor | ||
| 18:00 a 19:00 | Zumba – Miradoiro de Matadoiro Ioga – Praia de Riazor | Ximnasia aeróbica – Praia de Riazor Taichi – Miradoiro de Matadoiro | Zumba – Miradoiro de Matadoiro Ioga – Praia de Riazor | Ximnasia aeróbica – Praia de Riazor Taichi – Miradoiro de Matadoiro | Zumba – Miradoiro de Matadoiro |
| 19:00 a 20:00 | Tonificación – Praia de Riazor | Tonificación – Praia de Riazor | |||
| 19:30 a 20:30 | Marcha nórdica – Praia de Riazor Pilates – Parque Europa | Marcha nórdica – Torre de Hércules | Pilates – Parque Europa |
Nesta quinta edición de Coruña en forma será imprescindible contemplar as medidas de seguridade propias da normativa COVID. O número de persoas que poden participar en cada sesión verase condicionado polas medidas de cada momento. Para empezar, limitaranse as zonas de participación a un máximo de 15 persoas máis o monitor ou monitora.
