O Concello da Coruña quere impulsar o deporte náutico nunha cidade rodeada polo mar, e con este motivo lanza o programa ‘Coruña no mar’. Esta iniciativa contará cunha oferta variada de modalidades deportivas para a cidadanía, de balde, e cun total de 736 prazas (536 de semana e 202 de fin de semana).
Estas actividades náuticas desenvolveránse en colaboración con varias entidades da cidade entre o mes de xullo e o de setembro. A concelleira de Deportes, Mónica Martínez, presentou o programa no Matadoiro, subliñando que “a promoción da práctica dos deportes relacionados co mar converteuse nunha das tarefas máis importantes encomendadas pola nosa alcaldesa Inés Rey á Concellaría de deportes”.
O obxectivo: conectar A Coruña e o mar a través do deporte
A intención do programa ‘Coruña no mar’ non é outra que a de volver a cidade cara ao mar, coa costa coruñesa como unha instalación natural, un pavillón azul “que nos ensina a coñecer e aprender a querer e respectar o mar como fonte de riqueza, pero tamén como lugar de pracer, diversión e actividade física”.
Por estes motivos, un dos obxectivos da iniciativa é que as participantes continúen vinculadas á modalidade deportiva que escolleran e que poidan seguir practicando dita actividade despois do verán, da man das entidades deportivas coruñesas.
O único requisito necesario en ‘Coruña no mar’ é saber nadar
Este programa diríxese á cidadanía de calquera idade, co único requisito indispensable de saber nadar. As actividades de iniciación deportiva e lecer distribúense en dous bloques: cursos semanais intensivos (de luns a venres) e actividades de fin de semana quincenais (sábado ou domingo).
Segundo explicou Mónica Martínez, a intención é que as participantes adquiran as técnicas básicas dos deportes náuticos que se propoñen nesta primeira edición, ademais de coñecer, comprender e respectar as normas de seguridade e protección para desenvolver deportes acuáticos. En cada especialidade deportiva haberá nivel de iniciación e nivel de perfeccionamento. Para o curso de perfeccionamento será indispensable ter feito antes o de iniciación.
Os cursos semanais serán de surf (na praia do Orzán), paddle surf (no dique de abrigo), windsurf (na base náutica de Oza), piragüismo (en Oza), snorkel e foto subacuática (na praia de Santo Amaro) e vela lixeira (no club Marítimo de Oza, O Puntal).
Para o fin de semana quedan reservadas as actividades de kayak de mar (na base náutica de Oza), navegación costeira (na Dársena da Mariña), mergullo e pesca fondeada (no Club do Mar de Santo Amaro).
Neste proxecto colaboran Prado Surf, Marina Coruña, Club de vela Praia de Oza, Sociedade Deportiva As Xubias, Club do Mar de Santo Amaro, Vela Club Marítimo de Oza e Asociación Juan de Lángara.
Como inscribirse
As persoas interesadas deberán cubrir o formulario específico que está na páxina web de Deportes ou acudir ás oficinas na Cidade Deportiva da Torre, Polideportivo do Barrio das Flores e Palacio de Deportes de Riazor.
Para as actividades do mes de xullo, a inscrición poderá realizarse do 8 ao 14 de xuño, e para as de agosto e setembro, entre o 5 e o 12 de xullo.
