A Coruña sae á rúa no Día do Deporte na cidade 2021

O pasado domingo, a poboación da Coruña saíu á rúa para practicar actividade física no Día do Deporte na cidade. A cidadanía puido desfrutar de máis de 60 especialidades deportivas programadas polo Concello e entidades colaboradoras en nove puntos distintos da cidade.

O obxectivo da iniciativa foi fomentar a práctica deportiva, nunha aposta do goberno local pola cultura do deporte para todas e todos. Miles de persoas apuntáronse ao Día do Deporte na cidade, seguindo en todo momento os protocolos de seguridade sanitaria.

O Día do Deporte na cidade da Coruña

As familias chearon as zonas deportivas repartidas pola cidade. Nesta nova edición, o Concello da Coruña optou por descentralizar o Día do Deporte, levándoo aos barrios, que se converteron deste xeito nun escaparate da actividade física para toda a cidadanía.

A alcaldesa, Inés Rey, agradeceulle a súa implicación as 76 entidades deportivas e empresas que participaron na xornada, así como o labor desenvolto por Protección Civil e do voluntariado de distintas concellarías. O deporte chegou a todos os rincóns da localidade, con presenza na Cidade Deportiva A Torre-Arsenio Iglesias, Pista de Durmideiras, Pista de Petanca Santo Amaro, os Xardíns de Méndez Núñez, Cidade Deportiva de Riazor, a Casa da Auga, a praza de San Pablo, a praza de Tabacos e a praia de Oza.

Cada participante recibiu un “Carné do deportista”, no que foron selando en cada un dos nove puntos da cidade coa actividade superada nun tempo prudencial, e con respecto ás normas establecidas polo organizador en cada punto. Para fomentar a participación en todas as zonas e actividades algunhas valían dous selos.