- A segunda fase da Primera Nacional Feminina comeza hoxe, sábado 4 de marzo para o CW Pontevedra. O rival que visita a piscina da Escola Naval de Marín é o CN Molins de Rei.
Cos deberes feitos e a permanencia para a próxima tempada en categoría estatal xa no peto, o Club Waterpolo Pontevedra arrincará esta segunda fase cos obxectivos de seguir sumando experiencia e lograr a mellor clasificación posible. En xogo está o ascenso cando o obxectivo para as galegas neste primeiro curso en categoría estatal era simplemente a permanencia.
As deportistas da Cidade do Lérez xa están entre as oito mellores, e de aí só queda xogar, como o veñen facendo desde principio de tempada, sen complexos e con intención de gañar cada partido, para acabar o máis alto posible.
O único representante galego en categoría estatal feminina, o CW Pontevedra, parte nesta fase en sétima posición, pero empatado a puntos co 5º (Leioa), xa que os puntos logrados entre estes equipos na primeira fase mantéñense (contra Leioa, Canoe e Horta).
Por diante teñen as galegas do CW Pontevedra outras oito xornadas para enfrontarse, en partidos de ida e volta, aos seguintes rivais:
- CD Waterpolo Iruña 9802
- CN Molins de Rei Sintagmia
- CN Vallirana
- AR Concepción Ciudad Lineal
O primeiro será leste mesmo sábado, recibindo na piscina da Escola Naval Militar de Marín ao CN Molins de Rei Sintagmia, equipo catalán que finalizou en segundo posto do seu grupo e que agora ocupa a terceira posición con 10 puntos (2 máis que o CW Pontevedra).
O partido comezará ás 17:00 h, con entrada gratuíta, pero con obrigación de inscribirse nun formulario para o control de acceso ao recinto.
Na Liga Galega visita ao CW Pontevedra CN Ciudad de Oviedo
O Club Natación Ciudad de Oviedo, club asturiano que conta con sección de waterpolo, uniuse esta tempada ás ligas galegas de waterpolo para seguir adquirindo experiencia competitiva #ante a falta de competición en Asturias. E este sábado visitaranos por primeira vez, para xogar tres partidos das ligas galegas cos seus tres equipos.
Os tres partidos disputaranse na piscina da Escola Naval Militar de Marín, grazas á inestimable colaboración da entidade militar, aproveitando que hai xornada de Liga Nacional Feminina de Waterpolo.
Ás 11:45 h comezará o primeiro partido, que será o de Liga Galega Absoluta Masculina de División de Honra. O seguinte partido, que dará inicio ás 13:15 h, será o de Liga Galega Cadete Mixta.
Para pechar a xornada, tras o partido de Primeira Nacional Feminina, xogarase o de Liga Galega Absoluta Feminina de División de Honra, onde xoga o equipo “B” do CW Pontevedra.
“Os tres partidos serán unha oportunidade para seguir rodando e gañar minutos de experiencia”, explican desde o Club Waterpolo Pontevedra.
