A Coruña será a sede este sábado 10 de febreiro do Campionato Galego de Waterpolo alevín de inverno.
O torneo terá lugar na piscina municipal de Riazor, entre as 10.00 e as 20.00 horas. O Concello da Coruña aposta, deste xeito, por acoller na cidade torneos autonómicos de diferentes disciplinas, que congregan na Coruña a numerosos equipos e xeran un retorno económico inmediato.
O campionato confórmano os seguintes oito equipos galegos de waterpolo:
- CWC Rías altas
- CW Pontevedra A
- CW Pontevedra B
- CW Santiago A
- CW Santiago B
- CW As Mariñas
- RCN Vigo
- CW Ferrol.
Xogarán en formato de copa con finais polo primeiro ao último posto. Desta maneira, todos os equipos disputarán un total de tres encontros.
A piscina municipal de Riazor acollerá nesta xornada a un total de 80 nenos e nenas de entre 8 e 10 anos.
O concelleiro de Deportes, Manuel Vázquez, supervisará o desenvolvemento da proba e será o encargado de entregar os trofeos e medallas aos equipos gañadores deste Campionato Galego de Waterpolo alevín de Inverno.
