O bloque de xogadoras do BAXI Ferrol comeza mañá o traballo de pretemporada para preparar a súa participación na liga Endesa. No equipo departamental continúan cinco xogadoras da pasada tempada Claudia Soriano, Ángela Mataix, Marta Gómez, Jessica Fequiere e Marianne Kalin, mentres que incorporou a outras cinco xogadoras.
A americana Myah Selland chega procedente da Universidade de Dakota do Sur, onde cumpriu unha exitosa etapa, mentres que a checa Julie Pospisilova estivo o últimas catro tempadas na Universidade de Wisconsin. Ademais, a outra americana é Rachel Howard, que leva catro campañas en España nas filas do Alcobendas e que decidiu dar o salto á liga Endesa, da man do conxunto departamental.
A pivote finlandesa Anniina Aijanen regresa ao cadro ferrolán, despois de facer unha boa liga no Embutidos Pajariel Bembibre. É unha xogadora que xa coñece ben a maneira de xogar que impón Lino López.
A outra incorporación é a da catalá Gala Mestres, que vén de ser unha das mellores xogadoras da liga Challenge, co Joventut de Badalona.
Para mañá luns está previsto que as xogadoras se sometan a probas no Hospital Ribeira Juan Cardona, mentres que pola tarde, ás 19.00 horas, será a primeira sesión de adestramento no pavillón da Malata.
Nese exercicio estarán presentes todas as xogadoras do equipo, menos Jessica Fequiere, cuxa chegada se atrasará uns días e Gala Mestres, que compite coa selección española nun torneo 3×3 e que non se unirá ao grupo ata o xoves.
Para o martes está programado un adestro ás 12 horas, mentres que o mércores os adestramentos serán ás 10.00 e 19.00 horas.
Campaña de abonados do BAXI Ferrol
Ademais, segue aberta a campaña de abonados para poder renovar ou darse de alta, segundo informan desde o BAXI Ferrol. “Polo momento, renovaron o seu abono 937 persoas, mentres que se produciron 186 altas. Todas as persoas interesadas poden pasarse pola Taberna Arauxa, no Cantón de Molins 6, de martes a domingo de 12.00 a 15.00 e de 18.00 a 22.00 horas. Tamén se poden facer as xestións a través do correo electrónico abonadosuniferrol@gmail.com”, lembran desde o club.
