O plantel do Ulla Oil Rosalía de Chiqui Barros é novato na Liga Feminina 2 e a súa falta de experiencia pásalles factura. Hai xa seis xornadas que as brancas non se reencontran coa vitoria, malia os esforzos e o traballo de todo o equipo. A última derrota, contra o GDKO Ibaizabal, nun partido no que o adestrador recoñece que “o equipo competiu ata o final e estou moi orgulloso do traballo”.
Non está tan contento respecto ao resultado e admite que lle gustaría que “foramos capaces de ler mellor as situacións. Pero hai que entender que o rival é moi duro”.
Chiqui Barros sinala que, para ter gañado ao Ibaizabal, o Rosalía tería que ter chegado “case perfectas”, xa que ante un rival así “calquera fallo no tiro libre, na porcentaxe, calquera desasxuste no rebote o acabas pagando”.
Chiqui Barros: “Calquera fallo no tiro libre, na porcentaxe, calquera desasxuste no rebote o acabas pagando”
De todas formas, as compostelás plantáronlle cara ao contrario durante os corenta minutos de xogo. Este duelo foi “moi duro e moi físico contra un equipo que encaixa moi poquito, que fai un despregue defensivo enorme. Elas tiveron o control pero nós estivemos sempre con opcións”, resume o técnico.
As forzas de ambos equipos estiveron igualadas por momentos, polo que os detalles determinaron o resultado. Un exemplo que recorda o adestrador foi o tiro de Nuria no tramo final do partido, “que sae de dentro e nos tería posto a catro puntos. Non o metimos e no seguinte ataque elas meten. Iso fai que xa non teñamos opcións para gañar”.
Chiqui Barros: “Elas tiveron o control pero nós estivemos sempre con opcións”
A isto, Barros engade que en “catro situacións concretas tivemos un prexuízo brutal. Saímos danadas de varias decisións moi claras e en momentos nos que estabamos facendo esforzos moi grandes”, apunta.
Falta experiencia
Uns esforzos que, polo de agora, non se traducen en resultados. “Traballamos moito, cústanos moito anotar. Ler ben os espazos, saber onde están as vantaxes é unha cuestión de talento e experiencia e nós temos que seguir traballando porque o talento que temos é o que temos e a obriga nosa é exprimilo ao máximo e a nosa experiencia é moi limitada”, resume.
Chiqui Barros: “A medida que xoguemos moitos máis partidos destes seremos capaces de aprender máis”
Pero Barros móstrase optimista e asegura que “a medida que xoguemos moitos máis partidos destes seremos capaces de aprender máis deste tipo de situacións. Temos a equipos non tan fortes como Ibaizabal ou como Celta, así que a ser capaces de volver ganar. O faremos pronto”.
A seguinte cita pasa polo CGTD de Pontevedra, onde as compostelás enfrontaranse ao CB Arxil, o próximo 23 de xaneiro, ás 19:30 horas.
