Superior na táboa e na pista, o GDKO Ibaizabal venceu cunha forte defensa ao Ulla Oil Rosalía, que malia loitar e deixarse a pel no partido, non logrou romper a mala racha de resultados. Un 42-51 final alonxa un pouco máis ás compostelás dos seu obxectivo da permanencia.
Desde o 29 de novembro, o Rosalía non volveu sumar os dous puntos da vitoria. Na novena xornada vencían ao Barakaldo, pero o parón na seguinte, co adiamento do encontro contra o Magec, freou o progreso compostelán. E así ata esta décimo sexta xornada de LF2, na que as de Chiqui Barros sumaron a sexta derrota consecutiva; a peor racha da categoría.
Os esforzos do Rosalía non se traducen en resultados
É innegable a mellora que se ve nas filas das brancas adestradas por Barros. Novatas na categoría, lograron en numerosas ocasións plantarlle cara a algúns dos equipos máis fortes da competición. Pero o bo facer non se traduce en vitorias, tan necesarias para permanecer na segunda mellor categoría de España.
Esta xornada non foi excepción. O Rosalía saía enchufado á súa pista, malia a baixa de Alba Rama, lesionada no encontro ante o Celta Zorka Recalvi. O Ibaizabal abriu o marcador con dúas canastras, pero enseguida as compostelás responderon cun parcial 10-0.
As locais lograban así adiantarse no electrónico, pero tras un tempo morto das vascas, o xogo visitante subiu o nivel e co acerto de Tulonen achegábanse cada vez máis ao Rosalía. Pola parte galega, Chorén (con 12 puntos no primeiro cuarto) e Liste, lograron a vitoria pola mínima nos dez primeiros minutos, mantendo alta a confianza local.
No segundo cuarto, o equipo de Barros tivo máis dificultades para aguantar o ritmo e recibiu o dobre de puntos dos que anotou. A defensa do Ibaizabal impedía que Soares anotase para as brancas e iniciaba así a remontada. Un 27-34 ao descanso non apagaba a esperanza das galegas de sumar os puntos do trunfo.
No descanso as locais recuperaron forzas. O terceiro cuarto foi un pulso entre a dupla Tulonen e Koskimies para as visitantes e Chorén, Corredoira e Soares para as locais. Pero o Rosalía non lograba recortar distancias e, a dez minutos do final, aínda perdían de nove.
O resultado aínda estaba aberto cando comezou o último cuarto, e ambos equipos loitaban na pista para levarse os dous puntos. As locais facíanse fortes na defensa, pero isto non se compensaba con maiores acertos fronte ao aro, conseguindo só sumar cinco puntos. O mesmo lle sucedeu ao Ibaizabal, que non daba opcións ás rivais en ataque, pero tampouco lograba achegarse á canastra contraria.
A igualdade nos minutos finais beneficiou ás visitantes que, coa súa vantaxe lograda nos parciais anteriores, rematou por levarse a vitoria na pista compostelá. A superioridade do Rosalía desde a liña de tres ao longo do partido, non foi suficiente para compensar o acerto visitante nos tiros de dous e libres.
Tampouco bastou o acerto de Nuria Chorén baixo o aro, logrando ser a máxima anotadora do seu equipo e do partido, con 20 puntos. Un xogo máis repartido entre as compoñentes do cadro rival, no que destacaron Juana Molina e Rebeca Cotano como as MVP do partido, fixo que as galegas segan sen romper a súa racha de derrotas.
Así, tras dezaseis xornadas, o Rosalía ocupa a penúltima posición, con 18 puntos tras tres vitorias e doce derrotas e encaixando exactamente mil puntos en contra, fronte aos 849 a favor.
FICHA TÉCNICA
42) ULLA OIL ROSALÍA: Corredoira (12), Chorén (20), Carro (3), Carla García (-) e Soares (6) -quinteto inicial-. Tamén xogaron: De Matías (-), Rivas (-), Manivesa (-), Ángela González (-), Riera (-) e Liste (1).
51) GDKO IBAIZABAL: Ramasco (5), Molina (-), Tulonen (14), Koskimies (10) e Cotano (10) -quinteto inicial-. Tamén xogaro: Marcos (3), Arrien (6), Iruskieta (-), Aizpurua (3) e Vázquez (-).
PARCIAIS: 19-18, 8-16, 10-12 e 5-5.
ÁRBITROS: Elio Clavería e Iris Díaz
INCIDENCIAS: Partido correspondente á 16ª xornada da Liga Feminina 2 disputado no Instituto Rosalía de Santiago de Compostela.
