O parón na Liga Feminina Endesa afectou negativamente ao Durán Maquinaria Ensino, que volveu ás pistas cun partido moi irregular e perdendo ante un dos peores equipos da categoría, o Embutidos Pajariel Bembibre.
A actuación das lucenses foi motivo de descontento do seu adestrador, Carlos Cantero, que apuntaba á falta de concentración como causa desta derrota, pero pon xa a vista no que resta de tempada. “Temos que olvidar rápido esta derrota e seguir preparando os seguintes partidos”, declaraba no post partido.
Un rival a priori inferior, pero que foi quen de dominar ao Ensino
A competición regular está a piques de rematar, e os equipos que se xogan o descenso pelexan con unllas e dentes. Un deles é o propio Bembibre, con experiencia neste tipo de escenarios e que foi protagonista dunha remontada moi necesaria para o seu futuro.
Carlos Cantero: “Parecíamos novatas, juniors, con erros que non tiñamos que cometer”
“Parecíamos novatas, juniors, con erros que non tiñamos que cometer”, declaraba contundente o técnico lucense. O partido das galegas foi completamente irregular.
Nesta ocasión, o primeiro cuarto que adoita a atragantárselle ás lucenses non foi o problema. “Ao mellor o primeiro e o último cuarto foron mellor, pero non estou satisfeito. Fixemos un segundo e terceiro cuarto bastante malos. En vez de meternos en partido sobre a defensa, influían as canastras fáciles que fallabamos, as cousas que non pitaban baixo o aro e nos influenciaban na defensa para non defender como tiñamos que defender”, analizaba Cantero.
Este factor mental foi deteminante no devir do encontro, nun duelo no que o plantel do Ensino saíu completamente desconcentrado.
Ou todas ou ningunha
Malia destelos de xogadoras individuais como Stanacev (MVP do partido) e Helena Oma (debutante coa camisola do Ensino), Carlos Cantero sinala que o seu é un equipo que precisa de todas as xogadoras para sumar vitorias.
“Sabiamos que ía ser un partido complicado. Como ben nos ensinaron as vitorias que levamos, necesitamos que todas as xogadoras aporten para poder gañar. Da igual que sexa contra o cuarto, o quinto, que o penúltimo ou o último. Non podemos permitirnos o privilexio de que as xogadoras teñan un mal día”, aseguraba.
Carlos Cantero: “Non podemos permitirnos o privilexio de que as xogadoras teñan un mal día”
Unha das que estivo acertada foi a catalá Oma. Segundo o seu adestrador, esta xogadora aporta “intensidade a nivel defensivo. Estou moi satisfeito por como aprendeu os conceptos tácticos de ataque”.
Cantero móstrase optimista cara os seguintes partidos
Porén, grazas á boa posición do Ensino na táboa, que malia a derrota ocupa a sexta posición, fai que non salten as alarmas por perder este partido.
“Ao final, como lle dixen a elas, somos un equipo que demostramos que aprendemos do malo. Oxalá aprenderamos do bo, pero polo menos aprendemos algo. Pasounos noutras situacións da Liga, cando tiñamos un reto por primeira vez, o perdiamos e iso valia para aprender, mellorar e subir escalóns”, analiza desde un punto de vista optimista Cantero.
Carlos Cantero: “Somos un equipo que demostramos que aprendemos do malo”
No duelo ante o Bembibre as lucenses enfrontábanse por primeira vez a un conxunto que se o xoga todo e despois dunhas semanas marcadas pola incidencia da COVID-19. Se ben o Ensino non tivo que estar confinado, si que non puido adestrar con normalidade e tivo que adiar o encontro ante o Valencia.
Para o que resta de tempada, o técnico aputna que “toca resetear, ver onde estamos a nivel de equipo e xuntarnos outra vez e a tirar par arriba, que é o que estamos demostrando tras 23 xornadas que sabemos facer”.
