Xa o vaticinaba Carlos Cantero: “Imos entrar na parte máis difícil da tempada“. E primeiro paso e primeiro tropezo para o Durán Maquinaria Ensino. O parón na Liga Feminina Endesa freou o crecemento das lucenses, que retomaron a competición cunha derrota ante un perigoso Embutidos Pajariel Bembibre (68-63).
O Ensino afronta este tramo final de tempada con relativa tranquilidade. Gañaron a pulso estar na zona media da táboa, mantendo as opcións de acadar os ambiciosos obxectivos marcados para este curso: competir na Copa da Raíña e ter posibilidades nos playoffs. Pero non todos chegan nestas posicións.
Un exemplo é o Bembibre. Un equipo que loita por saír dos postos de descenso, pero que ten experiencia nisto de salvar a categoría. Por iso, malia ter peores resultados que as lucenses, presentábase como un rival perigoso, que tiña moito que gañar e pouco que perder neste enfrontamento ante o equipo de Cantero.
A predición do adestrador, que advertía na previa ás súas xogadoras da importancia de non confiarse ante un contrincante destas características cumpriuse. As locais souberon dominar o partido ante un Ensino frouxo e desconcentrado.
A falta de ritmo castiga ao Ensino
Desconcentradas e desconectadas. Así se puido ver ás xogadoras do Ensino sobre a pista do Bembibre Arena. Nesta ocasión, o primeiro cuarto non foi definitorio para o desenlace do partido.
Nos primeiros minutos, as lucenses fixeron gala do seu suposto superior nivel sobre as penúltimas clasificadas, pero deixando pouca marxe para evitar a remontada local.
Hempe foi a encargada de abrir o marcador, con dúas canastras baixo o aro lucindo o seu xogo interior que adiantaban ao seu equipo. No bando local, a efectividade da lucense víase contestada por Batouly Camara, a outra 5 sobre o parqué.
Pero foi Sara Rhine, co seu triple, quen lle deu a primeira vantaxe ás locais. Porén, o mando do partido cambiaba constantemente de mans. A defensa do Bembibre era cada vez máis forte, dificultando o xogo do Ensino, onde Stanacev buscaba crear ocasións, pero sen moito éxito.
Á terceira, a serbia logrou colar o balón no aro desde a liña de tres e con outro tiro de campo poñía o 15-16 no marcador. Outro triple de Stanacev aumentaba a distancia coas locais, no momento do debut de Helena Oma.
A nova incorporación ás filas do Ensino non defraudou e competiu a un nivel moi alto na defensa lucense. Á súa vez, Stanacev, outra vez desde os 6,75 metros, deixaba ás visitantes con tres puntos por riba á fin do primeiro cuarto.
Para o segundo tempo, un Bembibre que non ía deixar escapar a vitoria na súa casa reorganizouse e saíu a por todas. No conxunto visitante, Chatrice White estaba lista para contraatacar e manter ao seu equipo por diante. Xunto con Stanacev e Vega Gimeno, as galegas aguantaban o ritmo, ata que o adestrador local, Pepe Vázquez, solicitou un tempo morto.
O discurso do técnico fixo que o Bembibre reaccionase, e ao volver á pista asinaron un parcial 7-0, poñendo a un tiro de pedra a remontada, cun apretado 37-38 no marcador para o descanso.
O Ensino non soubo reaccionar na segunda metade
O Ensino foi de máis a menos na primeira metade, pero na segunda afundiu por completo. Superadas por un Bembibre concentrado e traballador, o partido escapóuselles ás galegas neste terceiro cuarto.
As leonesas crearon unha muralla inquebrantable en defensa, impedindo que as de Lugo se reencontrasen co aro. O cadro de Cantero comezou a fallar canastras fáciles, que afectaron ao estado mental do equipo e, polo tanto, á súa actuación na pista.
Nos primeiros tres minutos tras a reanudación, o Ensino non acertou baixo o aro, mentres que o Bembibre aumentaba a súa renda. O adestrador lucense organizou ás súas pupilas en zona e apostaba polo xogo interior, pero o acerto de xogadoras como White e Gimeno quedou en Galicia.
Un triple de Gladkova situaba ás locais a dez puntos das de Lugo, que xogaban xa desesperadas intentando tiros de tres para recuperar o ritmo anotador. Un robo de Stanacev á borde da fin deste parcial puxo o 55-48 no luminoso.
Nos últimos 10 minutos o plantel visitante pareceu espertar, grazas a un triple de Gimeno, e querer loitar por un partido, do que estivo desconectado a maior parte do tempo. Cando as de Cantero reducían distancias, as de Vázquez replicaban baixo o aro.
A medida que se achegaba o final, a tensión no parqué aumentaba e ambos equipos mantiñan un pulso cada vez máis igualado. O Ensino adiantouse cun triple de Aliaga, pero un 2+1 de Higgs devolveulle o liderado ao Bembibre.
Os fallos nos tiros e o nerviosismo apoderáronse das galegas neste último tempo, imposibilitando a buscada remontada. Nos segundos finais, unha falta de Bea Sánchez deulle ás locais a oportunidade de meter os dous tiros libres, deixando o 68-65 no marcador, que xa non cambiaría no final.
Stanacev, única lucense metida no partido
Os acertos do Ensino nesta xornada foron obra de Stanacev, elixida MVP do encontro, xunto con Silva no bando local. A serbia do equipo lucense foi a autora de 19 dos 65 puntos do seu conxunto e tamén se fixo con 4 rebotes.
Ao final do duelo, Stanacev logrou 24 créditos valorativos, unha variación en negativo de 7 puntos respecto a súa renda media.
FICHA TÉCNICA
68) EMBUTIDOS PAJARIEL BEMBIBRE: Silva (13), Palma (9), Higgs (9), Camara (8), Rhine (11) — quinteto inicial —. Tamén xogaron: Mendez (2), Mongomo (-), Kalin (4), Brotons (-), Gladkova (12) e Naczk (-).
65) DURÁN MAQUINARIA ENSINO: Hempe (12), Stanacev (19), Gimeno (15), Sánchez (3), Prieto — quinteto inicial —. Tamén xogaron: Aliaga (7), Oma (3) e White (6).
PARCIAIS: 19-22, 18-16, 18-10 e 13-17
ÁRBITROS: Francisco Zafra, Juan Carpallo e Igor Esteve.
INCIDENCIAS: Partido correspondente á xornada 23 da Liga Femenina Endesa disputado no pavillón do Bembibre Arena.
