O técnico do Durán Maquinaria Ensino, Carlos Cantero, falaba en rolda de prensa sobre a situación extraordinaria que se vive neste inicio da Liga Endesa 2020-2021. O adestrador lucense ofreceu a súa valoración explicando que, na súa opinión, “estamos nunha liga na que o calendario inflúe moito. Non é o mesmo empezar xogando fora. Comezar contra equipos que levan tempo sen adestrar por tema da COVID ou xogar aprazados. Isto é un mundo”.
Para Carlos Cantero a clave está en centrarse no xogo e situación propia debido á complicada lectura do calendario de competición: “Este ano a lectura dos calendarios e da liga é moi complicado porque sumas o tema de que se cadra che vén un equipo que leva cinco días sen adestrar ou xogas un mércores e o seguinte sábado, mentres que hai equipos que xogan sábado e sábado. Entón hai que centrase máis nun mesmo”.
Cantero: “Se cadra che vén un equipo que leva cinco días sen adestrar ou xogas un mércores e o seguinte sábado, mentres que hai equipos que xogan sábado e sábado. Entón hai que centrase máis nun mesmo”
Carlos Cantero destacou o papel de Merrit Hempe, xogadora que se incorporou este ano ao conxunto lucense do Ensino, tamén do cada vez máis importante traballo de Chatrice White: “Xa o dixen, que Chatrice chegou tan só hai dúas semanas e media, entón este tipo de xogadoras grandes cústalles un pouco máis entrar en tema de adaptación física. Pero unha vez que está, ao pouco xa se viu que dos tres partidos foi subindo minutos de xogo e sempre que saíu respondeu. A actuación deste último partido, estivo moi ben. En xeral as catro postes que xogaron, Bea, Vega, Chatrice e Hempe fixeron un partido bastante notable.
Na procura de boas sensacións e afianzarse en postos de ‘play-off’