- O BAXI Ferrol chegou a un acordo coa pivote finlandesa Marianne Kalin para que xogue no conxunto departamental a próxima tempada
A xogadora Marianne Kalin, que hoxe cumpre vinte e cinco anos, formouse na universidade americana de Hofstra e nas dúas últimas tempadas militou nas filas do Embutidos Pajariel Bembibre, nas que tivo unha destacada actuación, conxunto co que participou en 55 encontros. Ademais, foi internacional coas seleccións finlandesas de base e agora forma parte, de maneira habitual, da selección absoluta.
O adestrador do equipo ferrolán, Lino López, destaca sobre a nova incorporación ao equipo que “é unha gran profesional e moi boa compañeira de equipo, con experiencia e un rol importante en Bembibre en Liga Endesa, onde creceu moitísimo como xogadora durante estas dúas tempadas”.
Ademais, o preparador do BAXI Ferrol engade que “é unha pivote moi intelixente tácticamente e que sempre busca a mellor opción para o equipo. Ten un bo rango de tiro de cinco metros e, mesmo de tres puntos, capacidade para xogar de fronte 1×1. Defensivamente é unha das súas maiores virtudes con capacidade para defender a exteriores e interiores, presionar e ser agresiva”.
Marianne Kalin convértese na primeira xogadora do novo proxecto do BAXI Ferrol para disputar a liga Challenge.
Despedida da segunda adestradora Sandra Prieto que marcha ao estranxeiro
Por outra banda, a segunda adestradora Sandra Prieto non continuará no cadro ferrolán xa que, a pesar de que o club quería que continuase á beira de Lino López, a preparadora decidiu aceptar unha oferta para ir adestrar ao estranxeiro.
Desde o club desexánlle “moita sorte nesa nova etapa que vai afrontar e sempre terá as portas abertas para retornar á entidade departamental”.
Campaña de abonados
Está aberta a campaña de abonados para poder renovar ou darse de alta coa intención de manter un número de persoas similar ao da tempada anterior. Segundo informan desde o BAXI Ferrol, “polo momento, renovaron o seu abono 159 persoas, mentres que se produciron 9 altas e desde o club esperan que ao longo do mes de xuño increméntese considerablemente esa cifra. Todas as persoas interesadas poden pasarse polo Bar Sur, na rúa Magdalena 50, de luns a sábado de 12.00 a 15.00 e de 19.00 a 22.00 horas. Tamén se poden facer as xestións a través do correo electrónico abonadosuniferrol@gmail.com”
