Marisol Arias, ata agora psicóloga da canteira do RC Deportivo, é a nova incorporación do equipo da Academia Rafa Nadal en Manacor (Mallorca). Despois de case unha década, a profesional deixa o club branquiazul.
A especialista únese a talentos como José Sambade ou Mano Sotelo, así como Carlos Lalín, Pablo López e Fernando Rodríguez en profesionais exportados polo club branquiazul.
A formación de Marisol Arias comezou cunha licenciatura en psicoloxía pola Universidade de Santiago de Compostela e completouse cun Máster en Psicoloxía do Deporte e da Actividade Física e de Coaching Deportivo na Universidad Camilo José Cela.
No seu novo destino, a academia de tenis de Rafa Nadal, a psicóloga traballará con deportistas menores de 14 anos. Un campo no que xa ten experiencia, xa que co Dépor trataba a futbolistas das categorías inferiores tanto masculinas como femininas.
O propio Deportivo envía unha mensaxe de agradecemento a Marisol Arias pola súa “dedicación e profesionalidade desde 2012”, á vez que lle desexa “moita sorte nesta nova etapa na súa carreira”.
