A centrocampista Alba Merino asinou a súa renovación co Deportivo ABANCA por unha tempada máis, ata xuño de 2021.
Alba, que dentro dun mes cumprirá 31 anos, chegou ao conxunto branquiazul no verán de 2018 e xa é unha das capitás do equipo e peza clave no esquema de Manu Sánchez. A 8 demostra xerarquía dentro e fóra do terreo de xogo e é espello no que mirarse das xogadoras máis novas do plantel.
A futbolista extremeña foi unha das pezas clave do equipo que logrou o histórico ascenso á máxima categoría, xogando 21 partidos de Liga (17 goles) e os 4 do playoff. Alba, que se fracturou a clavícula no partido ante a Real Sociedad en Abegondo hai algo menos de dous meses, xogou como titular 14 dos 21 partidos que o Deportivo ABANCA disputou ata o momento na súa estrea na Primeira Iberdrola. Ademais, saíu desde o banco noutros 4 choques. Neses 18 encontros marcou 5 goles, 2 deles de penalti.
