Despois de dous anos de parón por mor da pandemia, a loita base volveu á acción co desenvolvemento da Xornada Norte da Liga de Deporte Base de Loitas Olímpicas. A cita, que xuntou a deportistas de 6 a 13 anos, celebrouse en Lugo.
A competición, pioneira a nivel estatal, estivo organizada pola Fegaloita, en colaboración co CL Lugo, o Concello de Lugo, a Deputación de Lugo e a Secretaría Xeral para o Deporte. O pavillón municipal dos Deportes lucense acolleu ata 146 nenas e nenos de seis clubs distintos, entre eles o convidado Club de Lucha San Lorenzo de Gijón.
Os mellores clubs da xornada norte de loita
A xornada rematou coa Escuela Ayude de Santiso como vencedora, sumando un total de 144 puntos. Preto dela rematou o Club de Vilalba, con 142. O bronce foi para o Keltoi de Vila de Cruces, con 81 puntos. Esta foi a clasificación:
- Escuela Ayude de Santiso
- Club de Loitas Olímpicas de Vilalba
- Club Keltoi de Vila de Cruces
- Club San Lorenzo de Gijón
- Club Atila de Ourense
- CL Lugo
Os tres primeiros clubs clasificados na xornada enfrontaranse aos tres mellores clasificados da xornada sur, mentres que os tres últimos do norte serán os rivais dos seus equivalentes no sur.
