Levamos xa seis xornadas de competición na Liga Femenina Endesa de baloncesto e os tres clubs galegos que militan nesta máxima categoría do basket estatal ocupan lugares diferentes na táboa. Nesta sexta xornada colleitaron vitorias o BAXI Ferrol e o Durán Maquinaria Ensino, pero o Celta Zorka Recalvi volveu caer derrotado. Ao conxunto que adestra Cristina Cantero estáselle a resistir o primeiro triunfo. As celestes son pechacancelas con seis derrotas de seis partidos.
O BAXI Ferrol é o equipo galego máis enforma no que vai de curso 2023-24 na Liga Femenina Endesa. As departamentais que adestra Lino López son sétimas con catro vitorias e dous derrotas. Suman 10 puntos e colleitaron un total de 434 puntos a favor e 417 en contra. Levan tres partidos seguidos sen perder.
O BAXI Ferrol tivo que ir á prórroga co Bembibre
A súa última vitoria foi como locais ante o Embutidos Pajariel Bembibre PD ao que venceron cun tanteo de 75-67 pero contra quen tiveron que ir á prórroga. Os parciais foron: 14-22, 16-16, 17-9, 13-13, 4-4 e 11-3. As leonesas son penúltimas e como o Celta Zorka Recalvi non teñen colleitado aínda unha vitoria, aínda así foron difíciles de superar na cancha da Malata.
Este final va por vosotros Afición!!!
Gracias A Malataaaaaaa
Sí se pudo 🚨🚨 pic.twitter.com/sd2SC1Cr8Y— Baxi Ferrol (@UniFerrol) November 3, 2023
O Durán Maquinaria Ensino é 13º na táboa de clasificación e parece que atopou o camiño da vitoria. Así remataron os seus dous últimos encontros. O primeiro triunfo das lucenses chegaba a domilicio e a costa do Kutxabank Araski. As lucenses venceron por un tanteo de 68-71 na xornada 5ª. O equipo que adestra Antonio Pernas viña de perder os catro partidos previos e tiñan ante si a un rival directo ao que se impuxo.
Xa nesta sexta xornada o Durán Maquinaria Ensino acadaba unha nova vitoria, a segunda. O rival desta volta foi o Cadi La Seu e o tanteo ao remate do partido foi de 46-57 a favor das lucenses. Con dúas vitorias o equipo da cidade da Muralla conseguía deixar o farol vermello da táboa e escalar ata o posto 13º.
A remuda como pechacancelas colleuna, lamentablemente, o Celta Zorka Recalvi. Ás celestes que prepara Cristina Cantero tárdalles en chegar o primeiro triunfo. Tampouco foi nesta sexta xornada. Perdía en Navia as viguesas por 61-66 co Kutxabank Araski. O primeiro período foi o que impediu ás galegas levar a vitoria. Os parciais foron: 17-22, 7-18, 22-19 e 15-7. A reacción do Celta Zorka Recalvi na segunda metade non abondou para darlle a volta ao electrónico.
