A Superliga Femenina 2 de voleibol complícase para o Autos Cancela Zalaeta. A un partido da fin da primeira volta, as coruñesas caeron 3-0 ante o, agora, segundo clasificado, o Extremadura Arroyo. Todos os sets foron para as locais, pero as galegas loitaron cada tempo achegándose sempre ás rivais.
As coruñesas chegaban dunha derrota contra o RGC Covadonga e querían seguir sumando puntos para achegarse ás primeiras posicións da competición. Non foi así, e o podio atópase cada vez máis lonxe do Zalaeta, que queda con 13 puntos no medio da clasificación, na sexta posición.
Jorge Barrero repetiu sexteto inicial para o seu equipo, con García, Quirós (máxima anotadora e mellor sacadora do conxunto), Guzzi (mellor bloqueador), Vázquez, Figueroa (mellor atacante) e Forteza. Pero a calidade das súas xogadoras non foi superior á do seu rival.
Notouse a ausencia de Bea Gómez
Os primeiros minutos foron dominados polas xogadoras do Zalaeta. A baixa de Bea Gómez notouse no cadro local, que saiu máis desenchufado ao inicio do encontro. O cadro galego ía por diante, pero as locais reaccionaron, mellorando as súas recepcións, e situándose a un punto das coruñesas. Antes da fin do primeiro set conseguiron adiantarse, asinando un 25-22.
Para o segundo tempo, o Extremadura colleu o ritmo marcando un parcial de 10-6, que non fixo máis que aumentar da man da líbero Julia Cabeza, logrando así anotarse outro set máis ao seu favor, cun 25-23.
Pero as galegas non baixaban os brazos e loitaron cada balón ata o final, aínda que sen bos resultados. A superioridade física das extremeñas fíxose patente e logrou unha distancia de oito puntos sobre as visitantes. O Zalaeta seguir pelexando e logrou sumar algúns tantos máis, quedando nun 25-21 o último set.
Os ataques e os aces decidiron o partido do Zalaeta
Malia mellorar os puntos que concede en erros propios, e aguantar o pulso nos bloqueos, o Zalaeta foi inferior tantos nos ataques (onde encaixou catro puntos máis que as rivais), como nos puntos directos, con dous a favor por oito en contra.
Con todo, a segunda máxima anotadora, por detrás de Flavia Dias, foi Alba Quirós, que anotou once tantos para o seu equipo. Tamén foi destacada a actuación de Eleonora Guzzi cos saques, sumando catorce puntos desta maneira.
FICHA TÉCNICA
EXTREMADURA ARROYO: María García, Yohana Rodríguez, Isabel Espino, María Larrakoetxea, Flavia Dias e Janine Sandell. Tamén xogaron: Desiree Castaño e Julia Cabeza (líbero).
AUTOS CANCELA ZALAETA: Cristina García, Alba Quirós, Eleonora Guzzi, Laura Vázquez, Carla Figueroa e María Forteza. Tamén xogaron: Patricia Santos, Paula Lorenzo (líbero), Andrea Rivas, Susana Suárez e Noemí Sánchez (líbero).
PARCIAIS POR SETS: 25-22 / 25-23 / 25-21 (3-0)
ÁRBITRO: Antonio del Toro Sánchez.
INCIDENCIAS: Partido da décima xornada na Super Liga Feminina 2 disputado no pavillón municipal Arroyo de la Luz.
