O Club Waterpolo Pontevedra xogará a segunda xornada de Primeira Nacional Feminina na piscina da Agrupació Esportiva Santa Eulalia (L´Hospitalet de Llobregat). Será mañá, sábado 14 de outubro, para medirse ao AESE, equipo co que xa xogaron as pontevedresas a tempada pasada na primeira fase.
O equipo pontevedrés, tras a espectacular estrea de liga con vitoria en Marín fronte a Dos Hermanas, espera aproveitar o nivel de motivación para seguir sumando puntos.
O equipo catalán, que debutou con derrota fronte ao Vallirana, non o poñerá fácil e non se deixará sorprender como o ano pasado.
As do Lérez viaxarán unha vez máis sen complexos e dispostas a baleirarse na piscina para conseguir a súa primeira vitoria a domicilio, sabendo que non será fácil, xa que enfronte terán un rival moi competitivo e con experiencia.
O partido entre Club Waterpolo Pontevedra e a Agrupació Esportiva Santa Eulalia comezará ás 16:00 h, e poderá seguirse minuto a minuto na web da RFEN.