Tiñan un reto, e acadárono. Era vital para as herculinas, poder sacar os primeiros puntos do ano como locais. O Viaxes Amarelle FSF afrontaba un partido importantísimo contra un rival directo, e coa necesidade clara de conseguir sacar o tres puntos para poder coller aire e ter vantaxe nos encontros contra contrincantes pola salvación na competición nacional. O resultado foi de 4-3 para as coruñeas diante do AD Teldeportivo.
Viviuse no pavillón da Sagrada Familia un partido onde as herculinas foron superiores en xogo e ataque, de feito chegaron a un parcial de 3-0. Pero un minuto tolo con dous goles practicamente consecutivos do AD Teldeportivo, meteu ás canarias no encontro e deixou un partido moi aberto cara á segunda metade. As galegas conseguiron manter unha vantaxe pola mínima e así puideron sumar os primeiros tres puntos na casa e acumular no seu casilleiro seis puntos.
O partido iniciábase cun Viaxes Amarelle FSF que quería mostrar o seu mordente e xerar xogo cara a portaría contraria, mentres que as visitantes estaban a tratar de conseguir sorprender á contra; pero as herculinas estaban moi serias en defensa e conseguían chegar con perigo á portaría do AD Teldeportivo.
Aos tres minutos de xogo, unha gran xogada persoal de María Gómez, acaba sendo rexeitada en dúas ocasións pola meta visitante, e no segundo rexeite, Martita recibía o balón atrás e con gran acerto mandaba o balón ao segundo pau. Foi aí cando Cris Lourés, cun gran disparo, conseguía pór o 1-0 no marcador, cando aínda non se chegou ao catro minutos de xogo.
Tras este primeiro gol das herculinas, o equipo visitante optou por subir a liña de presión e tentar igualar a contenda canto antes. Neste momento do xogo o Viaxes Amarelle FSF mostrábase sólido no seu papel e non presentaba fisuras, mentres seguía apertando forte ao seu rival. Aínda que as canarias tiveron ao cinco minutos a ocasión máis clara para empatar, Sandra estivo moi ben baixo paus e conseguiu salvar o balón. Esa parada outorgou máis confianza ás herculinas.
Xusto antes de chegar á medianía do primeiro tempo chegou o segundo. Foi froito dunha gran saída de presión das herculinas. Un pase de tiralíneas de María Gómez á banda contraria e unha gran xogada de Patri Corral que levaba á súa contraria para, cun disparo abaixo poñer o 2-0 no marcador. O partido púñase cada vez máis de cara para as herculinas do Viaxes Amarelle FSF.
Este segundo gol das galegas, fixo que o equipo de Jorge Basanta fósese crecendo sobre a cancha. Co 2-0 no marcador, empezou a mover moi rápido o balón e non dar opcións á rival; á vez que empezaba a gozar de ocasións cada vez máis claras para ampliar distancia no marcador.
Unha desas chegadas de perigo do Amarelle ocorría a falta de seis minutos. As galegas botaban un balón clarísimo, a porta baleira, fóra da cancha. O erro non fixo máis que afianzar ás xogadoras locais no seu xogo e manterse firmes na cancha, conseguindo manter a vantaxe de dous goles, cando se ían ao tempo de descanso.
As coruñesas conseguiron ter unha vantaxe de 3-0
Na segunda metade conxunto herculino saltaba ao parqué da Sagrada Familia coa intención de manter a vantaxe, e tentar ampliala, e conseguíao moi pronto. Aos 40 segundos de xogo Patri Corral, nunha gran xogada persoal desde cancha propia, levaba a todas a súa rivais para logo, xa diante da meta rival, optar por un potente disparo axustado ao pau que perforaba a meta contraria. Así, desde os sete metros, Corral puña o 3-0 no marcador para as herculinas.
O conxunto canario, optaba por esperar ás locais en cancha propia, e tentar apertar en primeira liña ás herculinas, para xerar contras perigosas e en superioridade. As galegas, nos primeiros instantes, conseguían manterse firmes na cancha.
Pero chegou o minuto parvo do partido para o Viaxes Amarelle. A falta de máis de 15 minutos para o final, Muni conseguía pór o 3-1 no marcador, tras un roubo de balón das visitantes. O gol chegaba cun disparo cruzado ao segundo pau desde dentro da área.
Apenas uns segundos máis tarde, nunha xogada de estratexia, Muni cun potente disparo exterior conseguía pór o 3-2 no marcador, e meter así ás visitantes no partido.
O conxunto herculino, non se veu abaixo. Nunha contra herculina, Martita cedía o balón a Cris Lourés quen, soa desde o punto de penalti, batía por abaixo á porteira do AD Teldeportivo e subía o 4-2 ao marcador, cando aínda quedaban máis de 13 minutos de xogo por diante.
Minutos finais de sufrimento para o Viaxes Amarelle FSF
Con todo, o encontro íase igualando por momentos. Aínda que as galegas loitaban por manter a vantaxe, o AD Teldeportivo nun disparo exterior de Vanessa de 13 metros conseguía meter un pouco máis ás visitantes no partido ao conseguir o 4-3.
Os minutos xa pesaban ás xogadoras e os equipos seguían buscando a intensidade no xogo, pero cada vez con máis imprecisións, e con varias ocasións moi claras desperdiciadas polas herculinas. Todo parecía presaxiar un final tráxico para as galegas que perdoaban moito.
Coa derrota pola mínima, as canarias optaron os últimos 4 minutos de xogo polo xogo de cinco para tratar de meter o medo no corpo ás galegas. As xogadoras de Jorge Basanta souberon sufrir o tramo final de partido para manter a leve vantaxe dun gol no luminoso, e quedar cos primeiros tres puntos como locais das herculinas.
Próxima parada, Navalcarnero
Tras esta nova xornada da tempada oficial, o Viaxes Amarelle FSF volverá aos adestramentos o vindeiro luns. A próxima fin de semana toca ás coruñeas partido contra un dos favoritos ao título de liga na Primeira División Nacional Feminina: o Futsi Atlético Navalcarnero. Así, o cadro herculino disputará a 8ª xornada do subgrupo A, o sábado 5 de decembro de 2020 ás 18:00 horas no Pavillón Municipal da Estación (Navalcarnero – Madrid).
FICHA TÉCNICA
VIAXES AMARELLE FSF: Sandra, Martita, Yaiza, Lau Doce e María Gómez – quinteto inicial -. Tamén xogaron: Cris Lourés, Sofía, Patri Corral e Candela Soria.
GRAN CANARIA FSF TELDEPORTIVO: Marta, Gallegos, Naira, Vanessa, Collado – quinteto inicial -. Tamén xogaron: Benete, Judith, Idoya, Muni e Andrea.
GOLES: 1-0 Cris Lourés (min. 4); 2-0 Patri Corral (min. 9); 3-0 Patri Corral (min. 22); 3-1 Muni (min. 24); 3-2 Muni (min. 25); 4-2 Cris Lourés (min. 26); 4-3 Vanessa (min. 32).
ÁRBITROS: Menéndez Nistal y Vilas López do Colexio de Árbitros da Mariña e Ourense. Mesa: Modroño Liz do Colexio de Árbitros da Coruña. Tarxetas: Diego del Viaxes Amarelle FSF (amarela). Collado, Benete, Vanessa e Cristina Gimeno do Gran Canaria FSF Teldeportivo (amarela).
INCIDENCIAS: Partido correspondente á sétima xornada do Subgrupo A da Primeira División Nacional Feminina de Fútbol Sala disputado o sábado 28 de noviembre de 2020 no Pavillón Municipal da Sagrada Familia (A Coruña) entre o Viaxes Amarelle FSF e o Gran Canaria FSF Teldeportivo.