Aínda que é de Castela, a corredora Pilar Montoya López defende as cores do Club Ciclista Riazor. Esta fin de semana a deportista do equipo galego participaba xunto con outros ciclistas da nosa comunidade autónoma no Campionato de España de Ciclismo Adaptado en estrada que tivo lugar en Cartagena.
A handbiker feminina Pilar Montoya compite na categoría WH4 Feminina sobre unha distancia de 12 quilómetros e acadou a segunda posición por detrás de Eva María Moral Pedrero do Flyz Torrelaguna que asinaba un crono de 20:23.47 polos 34:49.83 de Montoya.
Éxitos tamén para os ciclistas masculinos
Tamén coa malla do CC Riazor, o seu compañeiro de club Iván Manoel Montero, lograba dous ouros. O handbiker coruñés da Selección de Galicia impoñíase o sábado na carreira en liña, e defendeu con éxito o domingo a súa coroa estatal de contra o reloxo individual (CRI) na categoría MH5. O coruñés volveu liderar a actuación do cuarteto que luciu as cores do combinado autonómico no trazado murciano.
Segundo informa a Federación Galega de Ciclismo “ao igual que na xornada anterior, Montero venceu con moita solvencia. O percorrido de 14,5 km completouno en 25 minutos e 39 segundos, rodando a unha media de 3,5 km/h. O segundo clasificado, José Rojas (Sevilla No&Do), rematou a 5:21 do galego”.
Iván Montero sinalaba que “as sensacións foron boas e conseguín manter un bo ritmo”. Despois de revalidar o título o coruñés declaraba: “Na primeira volta xa collera ao segundo clasificado, polo que só quedaba manter o ritmo e desfrutar”. Segundo recolle a FGC, Montero amosouse “contento” polas dúas medallas, pese “ás dificultades deste ano para que se puidese disputar o este evento”.
Os outros corredores dirixidos nesta cita polo seleccionador galego Guillermo Sande asinaron resultados similares aos obtidos nas carreiras en liña. Álvaro Illobre terminou quinto na crono da categoría MH4, mentres que Severino Mata e Diego Pérez finalizaron noveno e décimo terceiro, respectivamente, na loita contra o reloxo da competición MC5.
