O Autos Cancela Zalaeta entra en racha logrando a segunda vitoria consecutiva, desta vez en casa ante o CV Torrejón cun contundente 3-0. Un trunfo vital para conseguir o obxectivo do ascenso, xa que as madrileñas son rivais directas nesta loita.
Con Laura Vázquez e Alba Quirós liderando ao Zalaeta, con 10 e 19 puntos respectivamente, o club coruñés suma tres puntos que o deixan no cuarto posto da clasificación. Tras este duelo, o terceiro clasificado está a catro puntos, o segundo a nove e o líder a 16.
O Zalaeta dominou en todas as facetas do xogo
As coruñesas foron de menos a máis. Nos primeiros minutos, as visitantes adiantábanse con facilidade no marcador. A igualdade reinaba na pista, pero o Torrejón soubo aproveitar os erros rivais. Anunciaba o marcador o 16-17 cando as de Barrero reaccionaron. No que restaba de set, as madrileñas só puideron sumar dous puntos, fronte aos nove das locais, que lle roubaron o primeiro tempo ás contrincantes.
Esta remontada da primeira manga levantou ánimos no banco local. O sexteto escollido por Jorge Barrero semellaba funcionar e o adestrador apenas fixo cambios. Neste segundo set o Zalaeta aumentaba con facilidade a distancia no electrónico, afianzando a vitoria local tamén neste tempo.
Para o set final, as madrileñas apretaron o acelerador, pero non o suficiente como para superar ás galegas. O ataque coruñés non perdoaba e en defensa as herculinas deixaban sen opcións ás madrileñas. Así chegou tamén a terceira manga para o Zalaeta, que puxo o broche final a unha vitoria que achega as posibilidades de ascenso a Liga Iberdrola.
As locais foron superiores en todas as posicións, destacando con Vázquez e Quirós no ataque e recepción e cun gran acerto nos bloqueos das centrais. No relativo aos puntos, as coruñesas sumaron máis por ataques, aces e bloqueos, incluso por erros do adversario, logrando desta forma 27 tantos vitais para a vitoria.
Para a próxima xornada, o Zalaeta visitará ao líder da Superliga Femenina 2 (SF2) de voleibol, o VP Madrid, o 7 de febreiro, ás 12:00 horas.
FICHA TÉCNICA
3) AUTOS CANCELA ZALAETA: Eleonora Guzzi (9), Cristina García (2), Laura Vázquez (10), Andrea Rivas (5), María Forteza Rey (3) e Alba Quirós (19). Tamén xogaron: Noemí Sánchez (líbero) e Patri Santos.
0) FUTURA CENTER ARENA RIVAS: María Aparicio (5), Sol Rosell (8), Paula López (5), Celia Gómez (3), Omaira Perdomo (9) e Eva Duarte (1). Tamén xogaron: Paula Alfaro (líbero), Paula Álvarez, Laura Usero.
PARCIAIS POR SETS: 25-19 / 25-17 / 25-19
ÁRBITRA: Barallo Busto
INCIDENCIAS: Partido correspondente á xornada 14ª da Superliga Feminina 2 disputado na pista do pavillón do Barrio das Flores (A Coruña).
