O conxunto do Autos Cancela Zalaeta quere olvidar as malas sensacións da derrota ante o penúltimo clasificado, o Arona Tenerife Sur. Con isto en mente, reciben o sábado, 28 de novembro, ás 19:00 horas ao Torrelavega 1895 no polideportivo municipal do Barrio de las Flores.
O partido perdido non fai que as coruñesas perdan a enerxía para loitar por estar entre as mellores da competición. Con trece sets a favor fronte a nove en contra e case 500 puntos anotados, o Zalaeta ocupa a cuarta posición da táboa clasificatoria tras seis partidos disputados.
O rival para esta fin de semana, o Torrelavega 1895, ven dunha traballada vitoria 3-0 contra o RGC Covadonga, nun dos duelos máis clásicos da competición. Con acertos en todas as liñas, as xogadoras dirixidas por Rubén Piquet non deron opción ás asturianas.
Agora, a súa máxima anotadora do último encontro, a capitá Aroa Sánchez, con 16 puntos, enfrontarase a unha das estrelas do Zalaeta, Alba Quirós. Na última cita, Quirós asinou un total de 26 puntos, e foi a terceira máxima anotadora da xornada. A oposta é ademais a segunda mellor da Superliga Femenina 2 de Voleibol.
No posto da líbero, destaca Noa Sánchez para as coruñesas que, segundo o listado da Real Federación Española de Voleibol, é a oitava mellor da competición. Sánchez entrou ademais no sete ideal da sexta xornada, tras o encontro contra o Voley Sanse Live Vuvuzela.
